هناء ابو علي-كود//

نشر موقع صوت امريكا اللي هو مؤسسة حكومية امريكية تمويلا و ادارة  و كتصدر ب 40 لغة وعندها مواقع و قنوات و اذاعات، نشر مقالة  بعنوان”  عدم الاستقرار السياسي ف المغرب كايدفع المغاربة يهاجرو بحال كاع الافارقة“.

المقالة اللي موقعة باسم كاتب الموقع  مارتن اروستيكي كتقول ان  عدد المغاربة اللي كايهاجرو بطريقة سرية كايزيد وهادشي سببه الوضع الاجتماعي السيء  وقمع المعارضة السياسية.

ويضيف الكاتب” الحكومة المغربية يالاه قبلات منحة اوروبية بقيمة 160 مليون يورو باش تلعب دور الجوندارم ف المنطقة وتحبس الهجرة الاوروبية ولكن  حتى المغاربة ولاو كايتلاحو  ف القوارب باش يهربو،ووصل عددهم ل 13 الف غير فشهر ثمنية الفايت وهو رقم غير مسبوق .. ”

وحسب الكاتب فهاد موجات الهجرة تزامنت مع  تعبيرات شبابية على معارضتها لتوجهات الحكومة و حتى على رغبتها ف اسقاط الجنسية.

وزاد  الكاتب  شي افكار كتبين انه ماشي مطلع على الوضع ف المغرب نيت و بدقة، فمثلا قال  ان الوضع السياسي ف المغرب وخصوصا قمع تمرد محلي ف الشمال -وكايقصد به حراك الريف -كان سبب ف تزايد الهجرة السرية و قال ان هاد التمرد كان سببه التأخر ف بناء مستشفى ف الحسيمة. و قال ايضا ان الحكومة المغربية أعلنت الطواريء و الحكم العسكري ف المنطقة  الشي اللي خلا قرابة 150 شخص يمشيو لشاطيء تطوان وخذاو القوارب باش يحركو لاسبانيا.. وهادشي  بطبيعة الحال ماشي صحيح، حراك الريف مايمكنيش يتوصف بالتمرد ولا الحكومة اعلنت الاحكام العسكرية ف المنطقة.