كود كازا//

ستمية موظف ديال لانابيك غيبداو الشهر ناكدين حيت مدازش ليهم الصالير. هاذي أول مرة كتوقع غيبدا الشهر وهوما باقي مدازش ليهم الصالير علما أنهم موالفين يتخلصو بكري ابتداء من 26 فالشهر. الصداع اللي ناض بين السكوري والمدير بلمعطي هو السبب حيث الاعفاء ديالها جا فلاخر ديال الشهر وملقاوش اللي يأشر على الأجور قبل مدوز.
حتا الكتابة العامة الجديدة اللي تعينات مؤقتا فبلاصت بلمعطي مبغاتش توقع الأجور نهار الجمعة اللي فاتت و النتيجة هو موظفين ديال الدولة مغاديش يتخلصو فالوقت وهذي فضيحة خايبة كتوقع فهاذ المؤسسة اللي كتعيش على وقع اختلالات مبغاتش تسالي.
دابا السؤال هو اشنو رأي الوزير السكوري اللي دار حرب على المديرة السابقة، وخاصو دابا يتحمل مسؤوليتو ويخلص الموظفين ويحل المشكل خاصة أن غالبية الموظفين عندهم التزامات مالية ضاغطة بزاف وميمكنش يصبرو حتا نهار بحال طريطات ديال الكريدي للابناك.
هاذ الشكل كيطرح حتا سؤال استمرارية الطابع المؤسساتي فكل الجوانب ومنها حقوق الموظفين متقاسش واخا يمشي اللي يمشي ويبقى اللي بقى.