كود – مونت كارلو //

فمقابلة  مع مجلة «فانيتي فير» تنشرات لبارح 16 دجنبر 2025، سوزي وايلز، كبيرة موظفي البيت الأبيض، عطات تصريحات صادمة على طريقة إدارة الرئيس الأمريكي دونالد ترامب وبعض الشخصيات اللي خدامة معاه. وايلز قالت أن ترامب عندو “شخصية مدمن على الكحول” وكيتصرف بحال إلى ما كاين حتى شي حاجة كتوقفو. هاد التصريحات شملت نائب الرئيس جاي دي فانس اللي قالت عليه تابع لنظريات المؤامرة، والملياردير إيلون ماسك اللي وصفاتو “متعاطي للكيتامين وغريب الأطوار”.

وايلز انتقدات حتى وزيرة العدل بام بوندي اللي ما نجحاتش فالوعد ديالها باش تنشر الوثائق على فضيحة إبستين، وراس فوت، رئيس مكتب الإدارة والميزانية، واعتبرتو “يميني متطرف”. وزادت كشفات على طريقة ترامب فإدارة ملفات السياسة الخارجية بحال أوكرانيا وفنزويلا، مؤكدة أنو بزاف ديال القرارات كيتخذها بدافع الانتقام.

وخا هاد الانتقادات، سوزي وايلز، اللي عندها 68 عام، صرّحات أن المقال اللي نشراتو المجلة “تقرير عدائي ومجتزأ”، وقالت أنه تم حذف بزاف ديال المعلومات المهمة اللي قالتها هي وناس آخرين على الفريق والرئيس ترامب من جهتو رد وقال أن وايلز كتدير خدمة زوينة  وأنه عندو “شخصية ذات نزعة تملكية”.

https://www.mc-doualiya.com/%D8%A3%D9%85%D8%B1%D9%8A%D9%83%D8%A7/20251217-%D9%83%D8%A8%D9%8A%D8%B1%D8%A9-%D9%85%D9%88%D8%B8%D9%81%D9%8A-%D8%A7%D9%84%D8%A8%D9%8A%D8%AA-%D8%A7%D9%84%D8%A3%D8%A8%D9%8A%D8%B6-%D8%AA%D8%AB%D9%8A%D8%B1-%D8%A7%D9%84%D8%AC%D8%AF%D9%84-%D8%A8%D8%AA%D9%82%D9%8A%D9%8A%D9%85-%D9%86%D8%A7%D9%82%D8%AF-%D9%84%D9%84%D8%B1%D8%A6%D9%8A%D8%B3-%D9%88%D9%88%D8%B2%D9%8A%D8%B1-%D8%A7%D9%84%D8%AD%D8%B1%D8%A8-%D9%8A%D8%B9%D8%AA%D8%A8%D8%B1%D9%87%D8%A7-%D8%A7%D9%84%D8%A3%D9%81%D8%B6%D9%84