كود هناء ابو علي ///

مهدي قطبي حالة خاصة فالمشهد الثقافي المغربي. فنان بسيط وسنوات ما بقاش يقيس فالصباغة. بغيتو تعرفو هاد الشي شوفو يديه كيف دايرين. الفنانة اللي يخدمو كتبان فيهم. فيديهم. المهم قطبي عندو اللي كيدير ليه هادوك الخربشات. فتاريخ الفن التشكيلي المغربي ما عندوش شي قيمة. ومع ذلك معهد العالم العربي بباريس دار ليه معرض استيعادي. علاش؟ لانو صاحب الرئيس ديالو الفرنسي جاك لانك. لان قطبي كيعرف يبيع٬ بحالو بحال فنان متوسط اسمو ماحي بينبين. هادو تجار كثر منهم فنانة. 

قطبي لوبييست اولا واخيرا. واعرة فالعلاقات العامة. منصبو كرئيس للمؤسسة الوطنية للمتاحف. تاريخ دستور 2011 غادي يبقى يذكرو باللي هاد السيد تعين قبل تشكيل الحكومة. حالة خاصة فكلشي.

فمعرض المعهد العالم العربي بباريس٬ كاع لملايرية فالمغرب طلعو غير يحضرو ماشي اهتماما بالفن. حضر سعيد لعلج ومولاي حفيظ العلمي وجات مرات ماكرون والوزير الاول السابق …

حضرو ملايرية خراين. حضرو ماشي دعما للفن. غير باش يبانو. مرة قال ملايري ردا “علاش باغي يشري لوحة من عند قطبي” باش كان داير معرض ف”اكتيا” التابع للتجاري وفا فزنقة الجزائر فكازا٬ باللي اللي همو ماشي طابلواتو٬ بل غير باش يكون مع شخصيات كبيرة فالبلاد يقول راه فلان خدا من عندي طابلو.

هاد الشي ينطابق على للي دبر عليهم وجاب ليهم واسمة من فرانسا وقضى ليهم مصالح شخصية ومهنية. 

خاصو يولي مسؤول علي مكتب للعلاقات العامة مكلف بفرنسا عوض فنان او رئيس المؤسسة الوطنية للمتاحف