كود بني ملال//

كيعيش المغرب هاد ليام موسم جني الزيتون، لي واحد من أهم المواسم الفلاحية فالبلاد، بالنظر للدور الكبير ديالو فاقتصاد الدواور والمداخيل ديال آلاف الفلاحين. هاد الموسم كيعرف إنتاج كبير فمناطق بحال مكناس، فاس، تاونات، الحوز، وزان، وبني ملال و العطاوية ، الاختلاف كاين فقط فالجودة حسب نوع الزيتون وطريقة الزراعة والتربة

أرقام الإنتاج الوطني

حسب المعطيات الرسمية، الإنتاج الوطني ديال الزيتون كيتجاوز 1.3 مليون طن سنوياً، وهاد السنة يقدر يوصل المحصول ل 2 مليون طن، مقارنة بالعام لي فات اللي كان تقريباً 950 ألف طن،المغرب كيطمح يرفع الإنتاج الوطني من الزيتون ل 3.5 مليون طن في أفق سنة 2030.

زيتون الأربكوينا.. مردودية وطالعة وجودة محدودة

من بين الأصناف اللي ولات منتشرة بزاف فالمغرب، كاين الزيتون الإسباني الأربكوينا، المعروف بحبّاتو الصغار وشكلو المدور وقشرتو الرطبة اللي كتولي كحلة كتلمع ملي كطيب، هاد النوع كيعطي مردودية كبيرة كتقدر توصل حتى 30 لتر للشجرة ، وهادشي خلا بزاف ديال المستثمرين يدخلوه فمشاريعهم خصوصاً فمناطق الغرب، اللوكوس وسوس.
ولكن، وخا الإنتاج الكبير، زيت كيبقى ضعيف الجودة، كيتأكسد دغيا وما كيتخزنش مزيان، ومداقو خفيف بزاف مقارنة مع الزيوت المغربية البلدية اللي كيعرفوها المغاربة “البيشولين المراكشية”. وهاد الضعف كيدفع بعض التجار يخلطوه مع الزيت الشجرة البلدية باش يتقاد المذاق ويتباع بثمن طالع.

الأصناف المغربية.. ماكلة ودوا

المغرب معروف بأصنافو المحلية اللي كتنتج أجود زيوت الزيتون فالعالم، وعلى رأسها البيشولين المراكشية اللي كتشكل تقريبا 70% من المساحة المزروعة، وكتعطي زيت ذهبي بمداق مجهد بين المرورة والحموضة ،كاين تاني الحوزية والمنارة، زيوت مليحة فالجودة، فيها نسبة عالية من المركبات الفينولية اللي كتحمي الزيت من الأكسدة وتخليه صالح للتخزين مدة طويلة اما زيتون المائدة، فالأفضل هو البيشولين لونكًدوك، اللي كيعطي حبة متوسطة الحجم وسهلة التخليل، وكيستعمل بزاف فمعامل التحويل فمناطق فاس، صفرو وتاونات.

التمن فالمغرب

حسب معطيات مهنية توصلات بيها “ݣود”، الأسعار كتراوح ما بين 6.5 و8 دراهم للكيلوغرام بالنسبة لزيتون العصر حسب الجودة ونسبة النضج،أما زيت الزيتون، فكتباع ما بين 60 و75 درهم للتر الواحد فالمعاصر والمعارض والتعاونيات، وكتوصل شي مرات لـ80 درهم فالمناطق الجبلية المعروفة بالجودة ،بالنسبة لـزيتون الأخضر المشقوق، الثمن كيدور ما بين 9 و12 درهم، والكحل ما بين 16 و18 درهم، وكيعرف طلب كبير فهاد الفترة قبل ما يترقد،وحسب المهنيين، هاد الأثمنة تقظر طلع مع تزايد الطلب .