كود الرباط//

الگراندي طوطو، نجم الراب المغربي، راجع اليوم بقوة بعد غياب ثلاث سنوات على منصة OLM السويسي بمهرجان موازين 2025، وتغييبه على جميع الحفلات خصوصا للي كتساهم ف تنظيمها الدولة. اليوم رجع وغايكون أول فنان مغربي وعربي يطلع فوق منصة السويسي وسط كبار النجوم العالمية.

عودة طوطو، صدمة لشي وحدين كيدعيو المحافظة وللي حاربوه من صحاب دعاة “الأخلاق” والإسلام السياسي. وحتى بعض المسؤولين الحكوميين خصوصا الناطق الرسمي باسم الحكومة لي قال انذاك بأن تصريحات طوطو غير مقبولة ونعمل على منع تكرار هذه السلوكات.

القصة ديال منع طوطو من أغلب الحفلات بدات فـ2022، ملي طوطو صرح بكل جرأة فندوة صحافية فالرباط، وقال: “كنستهلك الحشيش”، معتبرو سلوك عادي كيعكس واقع شريحة من المغاربة. التصريح دار ضجة كبيرة، وتعرض بسببه لمتابعات قضائية، لكن بزاف دالناس دافعو عليه وقالو أنو كان صادق فالتعبير على واقع اجتماعي بلا تصنع.

طوطو، عوض يطيح، زاد شد الطريق. تصدر سبوتيفاي فشمال إفريقيا والعالم العربي، بأكثر من 135 مليون استماع، وكسر أرقام قياسية بألبومات “Caméléon” و”27”.

واليوم، منصة OLM السويسي، لي كانت ديما كتستقبل كبار العالم بحال دافيد غيتا ومارون 5، غادي تهتز مع صوت طوطو، فاش كيرفع الراية ديال الراب المغربي الحديث قدام جمهور دولي.