كود سبور//

دار البرتغالي جوزي مورينيو مدرب فنربخشة التركي، اجتماع مع مهاجم الفريق، الدولي المغربي يوسف النصيري حيث النيفو ديالو نقص.

وكشفت جريدة Takvim التركية، أن مدرب فنربخشة جوسي مورينيو دار اجتماع خاص مع مهاجم الفريق يوسف النصيري، وأن هذه الخطوة جات من المدرب مع اللاعب حيث النيفو ديالو تراجع خلال الأسابيع الأخيرة، داكشي علاش گلس معه قبل ماتش الديربي ضد بشيكتاش فالبطولة التركية، ووضح نفس المصدر، أن جوزي مورينيو جدد الثقة ديالو فيوسف النصيري خلال هذا الاجتماع، وطلع له المورال، مع العلم أن المهاجم المغربي ماركا فهاد الموسم الأول له مع فنربخشة 26 هدف وعطى 7 ديال التمريرات الخاصة خلال 47 ماتش لعبو.

وللإشارة كانت وسائل إعلام تركية، قالت قبل أسابيع أن يوسف النصيري ما ناويش يكمل مع فنربخشة، وأنه باغي يمشي بحالو مع نهاية هذا الموسم، بسبب الضغط اللي داروه عليه جمهور الفريق حيث مستواه تراجع مؤخرا، بعدما كان محيح وسط الموسم، مع الإشارة إلى أن بداية الموسم كانت صعيبة عليه باش يتأقلم مع الفريق، والمدرب جوزي مورينيو هو اللي دافع عليه ضد الانتقادات، وشجعو بزاف وكان هو اللي ورا التعاقد معه.