كود اصيلة ///

ول البارح الجمعة 2 اكتوبر كان افتتاح الدورة الـ47 من موسم أصيلة الثقافي الدولي بمكتبة بندر. الموسم اللي كتنظمو مؤسسة منتدى أصيلة، بشراكة مع وزارة الشباب والثقافة والتواصل (قطاع الثقافة)، وجماعة أصيلة، حدث ثقافي كبير وديما كيكون فيه الحدث السياسي.

هاد الدورة كانت فيها اسماء كبيرة. اسم عندو دلالة خاصة اللي هو حكيم الديبلوماسيين الصبليون ميگيل انخل موراتينوس. وزير خارجية اسبانيا فحكومة ثاباتيرو الاشتراكية ما بين 2004 و2010 وبعدها كانت عندو مناصب مهمة فالاتحاد الاوربي والامم المتحدة. حضور هاد الاسم فهاد ليام للمغرب ولاصيلة رسالة واضحة من هاد الديبلوماسي المخضرم للصبليون من اعلامييه وسياسييه.

موراتينوس بدا يومو فاصيلة الجمعة اللي فاتت بزيارة قبر صديقو الراحل مؤسس موسم اصيلة ووزير خارجية المغرب الاسبق محمد بنعيسى. ترحم عليه رفقة رئيس مؤسسة منتدى اصيلة حاتم البطيوي.

زيارة لروح هاد السياسي والمثقف اللي رجع من مدينة للصيادين اكورا للحوار وقبول الاخر.

فهاد ليام العلاقات المغربية الصبليونية ماشي حتى لهيه. كتشفنا اسبانيا باعلامها وسياسييها كتشوف من الفوق للمغرب. لحريگ لكبير ل70 شخص لسبتة يومي 30 و31 يوليوز اللي فات كانت غير سبة. شفنا من اليمين المتطرف حتى اليسار الراديكالي والاحزاب القومية ودوز على اليمين المحافظ واليسار، كلشي ناض كيسب فالمغرب. كيهاجم فيه. اعلامهم بين على مرض مزمن ضاربهم.

وسط هاد الظلمة كاين امثال موراتينوس اللي تلاقاتو “كود” قبل افتتاح الموسم بمطعم گارسيا الشهير بزنقة ميليلية فاصيلة. هاد الديبلوماسي وفي لروح اصيلة. المغرب واسبانيا مكتوب عليهم يتعايشو ويتواصلو ويتحاورو. هادا هو موقفو كيف لخصو. ديبلوماسي كيدافع على الجورة. المغرب جار لاسبانيا. اللي مسو مسها وللي ضرو ضرها والعكس صحيح. مصير مشترك رادتو الجغرافيا.

موراتينوس جا لاصيلة للدفاع على هاد التعايش المشترك بين ماشي غير المغرب واسبانيا بل بين الحضارات على اختلاف ثقافاتها. ما عاجبوش اش واقع اليوم. الحل الوحيد هو اللي كدافع عليه اصيلة هادي 49 سنة: الحوار واحترام الاختلاف. موحالش غادي يسمعوه فاعلام الجارة الشمالية اللي خدام كيشعل فالعوافي.