كود – وكالات//

المشروع اللي كان خرج على أساس أنه غادي يتبنى فواحد المنتزه ديال «دراغون بول» حدا باريس، ولى دابا فيه الشك، بعدما الشركات اليابانية اللي عندها حقوق السلسلة نفت أنها وافقات عليه أو عطاتو أي ترخيص.

شركة «توي أنيميشن» وضحات فبلاغ نشراتو باليابانية، أن الأخبار اللي قالت باللي تقرر بناء مدينة ملاهي ديال «دراغون بول» ففرنسا ماشي صحيحة، وأكدات أن الشركة، معطاتش حتى ترخيص لهاد المشروع، وما عندهم حتى معلومات عليه.

الخبر كان تْعلن عليه نهار 24 غشت، فاش كان ولي العهد السعودي الأمير محمد بن سلمان فزيارة لفرنسا، وقتها تْعلن على مشروع كبير بقيمة 6 مليار يورو، كيهضر على بناء 3 مدن ملاهي على بعد 35 كيلومتر تقريباً شمال غرب باريس.

ومن بين المشاريع اللي تْربطات بهاد الإعلان، كان منتزه جاي من «دراغون بول». وحتى مستشار الرئيس الفرنسي إيمانويل ماكرون قال بلي الفكرة جات من نقاش بين ماكرون ومحمد بن سلمان، بعدما اكتاشفو الاهتمام المشترك ديالهم بالمانغا، وبالخصوص «دراغون بول زد».

ولكن دابا الصورة تبدلات، شركة «شويشا»، الناشر الياباني ديال المانغا، قالت إنها ما عندها حتى علاقة بالمشروع الفرنسي. وحتى شركة «بانداي نامكو إنترتينمنت»، اللي عندها بعض الحقوق المرتبطة بـ«دراغون بول»، ما بغاتش تعلق على الموضوع.

وزادت «شويشا» وضحات أن الرسومات اللي استعملاتها بعض وسائل الإعلام باش تْبين شكل المشروع الفرنسي، هي فالأصل رسومات سبق تنشرات فمارس 2024، ملي تعلن على مشروع منتزه «دراغون بول» فمدينة القدية فالسعودية، وماشي على شي مشروع ففرنسا.