گود سبور//

اكد الجنوب أفريقي باتريس موتسيبي، مرة أخرى انه ما راضيش على الانسحاب اللي دارو السنغال ففينال كاس أفريقيا 2025 امام المنتخب الوطني المغربي، واعلن ملي وصل للمغرب فزيارة وهو جاي من السنغال، ان هذا كان سبب فتغيير مجموعة القوانين فالكاف، باش ما يبقاوش يتعاودو بحال هاد الاحداث واللي انسحب غادي يتعاقب.

وقال باتريس موتسيبي ملي وصل للمغرب صباح اليوم الخميس، فتصريح للموقع الرسمي للجامعة الملكية المغربية لكرة القدم: “جيت للمغرب للتعبير عن التزامي الشخصي العميق تجاه الشعب المغربي، وكذلك نيابة عن الاتحاد الأعضاء اللي كاتمثل 54 دولة فأفريقيا، وكانعبر على التزام هاد الدول الـ54 تجاه الشعب المغربي، والجامعة الملكية المغربية لكرة القدم والملك محمد السادس وحكومة المغرب، وكانبغي نعبر على التزامنا مع الجامعة الملكية المغربية لكرة القدم باش نخدمو مع بعضياتنا تحت القيادة المتميزة ديال خويا فوزي لقجع، وكانعبر على حبنا للشعب المغربي والجامعة والملك محمد السادس”.

وكمل موتسيبي وقال: “كنا شاهدين على كاس أفريقيا 2025، وعبرت فشحال من مناسبة على خيبة أمل كبيرة بزاف تجاه داكشي اللي وقع فالفينال، وحنا خدامين باش نبدلو قوانين ولوائح فالاتحاد الافريقي لكرة القدم، وحتى على لوائح كرة القدم الأفريقية لضمان معالجة فعلية لبعض الثغرات، راه مسابقات الكاف بما فيها كاس أفريقيا تستند للوائح الاتحاد الدولي لكرة القدم الفيفا، وهي من أحسن اللوائح فالعالم، وواخا هذا الشي راه كايبان لينا ان شي لوائح خاصهم يتبدلو، وكيفما قلت من قبل راه كاينين شي مخالفات خاصهم عقوبات كايتناسبو معها وتكون ملائمة وخاصنا نتأكدو من احترام هاد اللوائح، والتزامنا بهاد القوانين كايعكس عزمنا لضمان احترام كرة القدم الأفريقية”.