كود – وكالات//

ولات المهندسة الألمانية ميشيلا بنتهاوس أول وحدة فالعالم كتطلع للفضاء وهي كتستعمل الكرسي المتحرك، بعدما شاركات فواحد الرحلة قصيرة مع شركة بلو أوريجين ديال جيف بيزوس، الرحلة كانت بصاروخ نيو شيبرد، ودامات تقريباً عشر دقايق، وخرجات فيها ميشيلا مع خمسة ديال السياح الفضائيين حتى دازو الحد لي كيفصل  بين الجو والفضاء.

ميشيلا خدامة مهندسة فالطيران والفضاء فوكالة الفضاء الأوروبية، وكتستعمل الكرسي المتحرك بسبب إصابة فالنخاع الشوكي من بعد كسيدة بالبيكالة فالجبل، فتصريح ليها قالت باللي من بعد لي وقع ليها فهمات شحال العالم مازال ما مفتوحش مزيان قدّام الناس اللي عندهم إعاقة.

وضافت باللي المجتمع إلى بغا يكون ديال بصح، خاصو يكون مفتوح لكلشي، ماشي غير فالحوايج اللي ساهلين ولا اللي باغي يشوف فيهم راسو متقدّم، كلامها جا قوي وخلّى بزاف الناس يتفاعلو مع التجربة ديالها.

الصاروخ طلع بطريقة أوتوماتيكية، والكبسولة تفصلات عليه ومن بعد هبطات بشوية فصحراء تكساس. هادي هي الرحلة المأهولة رقم 16 لبلو أوريجين، واللي بغات تنافس شركات كبار بحال سبيس إكس وفيرجن غالاكتيك، وهاد الحدث تعتبَر رسالة واضحة باللي الفضاء خاصو يكون مفتوح للجميع.