كود -كازا //

علنات إدارة مهرجان “موازين” على تاريخ تنظيم الدورة 21 ديال واحد من أكبر التظاهرات الفنية فالمغرب، اللي كيجمع نجوم كبار من العالم.

وحسب الموقع الرسمي ديال المهرجان “الدورة الجاية غادي تتنظم ما بين 19 و27 يونيو الجاي، يعني سيمانة كاملة ديال الحفلات والعروض الموسيقية والحيحة والنشاط بحضور فنانين مغاربة وعالميين.

الافتتاح غادي يكون مع الرابور الفرنسي “Ninho” فوق منصة السويسي، وهو واحد من أشهر الأسماء فالراب الفرنسي دابا، وعندو جمهور كبير فالحفلات ديالو.

المهرجان فالدورة اللي فاتت عرف حضور أسماء بحال كاظم الساهر وماجدة الرومي، وحتى الفرقة الكورية “Aespa”، وطوطو، وشيرين عبد الوهاب، مو بلاك، راغب علامة، وعبد الله الداودي وزيد وزيد.

موازين كيبقى واحد من أهم المهرجانات الموسيقية فالمغرب وإفريقيا، حيث كيجمع ستيلات موسيقية مختلفة وكيجيب جمهور واسع من داخل وخارج البلاد، وكيحوّل الرباط كل صيف لمنصة فنية عالمية.