كود – كازا ///

نشرات مؤثرة كوبية تدعى بـ”باولا بيريز” (@havanaluait) مقطع فيديو على منصة “تيك توك” وهي غاضبة بسباب اللي طرا ليها في مطار مغربي، بعد إخضاعها لمراقبة وتفتيش جمركي.

وقالت في بداية الفيديو، اللي حصد أكثر من 33 ألف مشاهدة وأكثر من 1500 إعجاب: “بعدما دزنا عبر السكانير، خبرونا أنه يتعين علينا الإفصاح عن المتعلقات الشخصية”. وهاذ الشي عادي حيت القانون المغربي واضح.. اذا كنت هاز معاك كاش أكثر من 100 ألف درهم مغربي (حوالي 9200 يورو)، فـ ضروري التصريح بذلك لدى الجمارك.

وأضافت المؤثرة، أنه تم إخضاع الباليزات ديالها للتفتيش الجمركي ولقاو فـ وحدة منهم ثلاث ساعات من ماركة رولكس ما صرحاتش بهم للديوانة، وهاذ الشي تسبب ف حجز هاذ الساعات الغالية وفرض غرامة عليها قدرها 16 ألف يورو.

المؤثرة حاولات تنفي على راسها تهمة التهريب، بقولها أنها طلبات المساعدة القانونية ولقات أنه كان عليها تصرح بالساعات والأمتعة الشخصية بسباب قيمتها الغالية وحاولات تسبي كلشي في السفارة اللي ما عطاتهاش معلومات كافية حول التصريح بالمتعلقات الشخصية..

كاين شي سائحين كيسحاب ليه غير سير لمطار دولة ما عارف عليها والو ودير عليهم التبهلة.. جايبة معاك 9200 يورو كاش و3 ديال روليكسات.. آش غادي نسميو هاذ الشي من غير تهريب..