ݣود-عثمان الشرقي//

علن مهدي قبّاج، طليق سكينة بنجلون، أنه مستعد يتنازل بشكل نهائي على الشكاية اللي كان رافعها ضدّ طليقتو بتهمة التشهير، بشرط يكون التزام أخلاقي كيحافظ على الاحترام المتبادل وكيضمن راحة الدراري واستقرارهم النفسي.

وجا هاد القرار، حسب بيان موجه للرأي العام، فإطار رغبة قبّاج باش يتجاوز الخلافات ويحط مصلحة العائلة فوق أي حاجة أخرى على ما قال .

وأكّد قبّاج فهاد البيان أنه ماطالب حتى بشي تعويض مالي رغم أنه عندو الحق قانونيًا، حيث كيعتبر أن “الفلوس ما كترمّمش القيم وما كتعوّضش الشرف”، وزاد أن الدافع ديالو الرئيسي هو حماية الأبناء وتجاوز التوتر اللي دار فهاد الملف.

وبيّن من جهة أخرى أنه تعرّض لحملات تشويه مستمرة مست سمعته وحياته العائلية، ولكن اختار – على حد قوله – ’’طريق التسامح والصلح عوض التصعيد‘‘.

وزاد قبّاج وانتقد ما سماه بـ”الخرجات غير المسؤولة فالسوشيل ميديا” اللي زادت خلات الوضع معقّد، وضاف أنه عمرو منع أم من ولادها، وأن القرارات العائلية كانت كتدار باحترام متبادل.

وختم قبّاج البيان ديالو بالتأكيد أن قرار التنازل جا من قيم العفو ورغبتو فاستقرار الأسرة، واعتبر أن الخطوة اللي جاية بيد الطرف الآخر اللي خاصو يصادق على الالتزام الأخلاقي.