كود سبور//

حط مهدي بنعطية الاستقالة ديالو من الإدارة الرياضية ديال أولمبيك مارسليا الفرنسي، احتجاجا على اقالة صاحبو المدرب الطالياني روبيرتو دي زيربي.

وحسب قناة RMC Sport، قدّم بنعطية المدير الرياضي بأولمبيك مارسليا استقالتو الى رئيس النادي بابلو لونگوريا، واللي رفض هذه الاستقالة فالبلاصة.

نفس المصدر، وضح ان بنعطية عبر على التضامن ديالو مع المدرب المقال وبرتو دي زيربي، وأنه جا إلى أولمبيك مارسيليا على قبل باش يكون جزء من هذا المشروع اللي فيه 3 سنين، وان المدرب الطالياني ما كايتحملش المسؤولية بوحدو فهادشي اللي وقع للفريق، داكشي علاش خاصو حتى هو يتحمل المسؤولية كمدير رياضي.

القناة الفرنسية، كشفت ايضا ان مهدي بنعطية دار اجتماع مع لاعبين أولمبيك مارسليا البارح الاربعاء خلال حصة تدريبية، وتفرگع عليهم مزيان وقدام رئيس النادي، وقالهم بلي كاينين شي لاعبين منهم ما باغيينش ينضابطو وكايعتابرو القواعد داخل النادي قاصحة، واكد انه غادي يكمل الخدمة ديالو فالنادي، ولكن وحسب القناة الفرنسية فهو ما شادش فالبوسط ديالو، ويقدر يمشي فأي وقت.