كود -وكالات//

صادقات بريطانيا على قانون جديد كيهـدف باش البلاد تولّي بلا گارو تدريجياً، يمنع بيعو لأي واحد تزاد من بعد 1 يناير 2009.

وبموجب هاد القانون، أي واحد دابا عندو 17 عام ولا أقل، ما غاديش يقدر يشري الگارو بشكل قانوني طول حياتو، حتى منين يكبر ويوصل لسن الرشد.

وزيد على هاد الشي، القانون كينص حتى على توسيع منع التدخين فعدد من الأماكن العمومية المفتوحة، بحال ملاعب الأطفال وحذا المدارس والسبيطارات، باش ينقصو من التعرض للدخان ديال التبغ بطريقة غير مباشرة.

الحكومة البريطانية رحّبات بهاد القرار، ووصّفاتو بلحظة تاريخية، خصوصاً بعدما صوّت عليه البرلمان بأغلبية كبيرة، وغادي يدوز دابا لمرحلة الموافقة الملكية اللي غالباً غير إجراء شكلي.

وكتقول التقارير أن المملكة المتحدة هي ثاني دولة فالعالم دارت هاد السياسة ديال “الحظر التدريجي حسب الأجيال”، من بعد جزر المالديف اللي سبقاتها فـنوفمبر، وقررات تمنع البيع لأي واحد تزاد من بعد 1 يناير 2007.

وكان البرلمان البريطاني سبق وصادق حتى على منع السجائر الإلكترونية ديال الاستعمال الواحد ابتداءً من يونيو 2025.

نيوزيلندا كانت حتى هي  دارت قانون  فـ2022 ولكن تراجعات عليه من بعد تبدلات الحكومة.