وكالات//

دخل النجم الميريكاني جورج كلوني ومرتو المحامية الحقوقية أمل علم الدين، ومعاهم التوأم ديالهم، فـلائحة المواطنين الفرنسيين الجداد، وهاد الشي جا بموجب مرسوم رسمي ديال التجنيس تـنشر نهار السبت فالجريدة الرسمية ديال فرنسا.

وأكدات وكالة “فرانس برس” بلّي المرسوم كيشمل الزوجين وولادهم اللي عندهم 8 سنين، فخطوة كتبيّن العلاقة القوية وحب هاد العائلة لفرنسا، حيث من عام 2021 وهما مالكين دار فالبادية ومزرعة ديال العنب فمدينة برينيول فالجنوب ديال البلاد.

وبعيد على هوليوود، كيدوز جورج كلوني، اللي معروف بأدوارو فمسلسل “ER” وسلسلة أفلام “أوشن”، مع مرتو المحامية اللبنانية-البريطانية، جزء من حياتهم ففرنسا.

وفتصريحات سابقة، عبّر الممثل والمخرج اللي ربح الأوسكار على العشق ديالو للثقافة الفرنسية، وقال بلّي السبب الأكبر اللي خلاه يرتابط بفرنسا هو “الخصوصية”. وقال كلوني: “هنا ما كيتصوّروش ولادك، وما كيبقاوش مصوري الباباراتزي مخبّيين حدّا المدرسة، وهاد الشي مهم بزاف بالنسبة لينا‘‘.

ورغم أنه اعترف، وهو عندو 64 عام، بصعوبة تعلّم اللغة الفرنسية، وقال على راسو بلّي “مازال ضعيف فيها” رغم أنه دوز 400 نهار ديال الدروس، إلا أنه أكد بلّي الدار ديالو فالجنوب ديال فرنسا هي أسعد بلاصة بالنسبة للعائلة ديالو، بعيد على ضجيج وأضواء هوليوود.