سهام البارودي – كود//

قبايلة وانا خارجة شفت واحد المنظر زوين ! عيالات بجلالبهم واقفين كايتفرجو جنب واحد القهوة فالماتش ديال المنتخب مع مصر ! كانو خارجين يتسخرو و لقاو راسهم واقفين ها لي هازة ولدها ها لي هازة ميكة ديال السخرة و كايتفرجو بواحد الخشوع فالماتش !

على داك المنظر و على دوك العيالات و دوك ليجون و دوك الرجال لي واقفين فجناب القهاوي كانقول يا ربي يربح هاد المنتخب واخا غي يفرحو هاد الناس ! نفرحو تاحنا فحال لي كايفرحو الكاميروونيين و المصريين و حتى الجزائرين لي خرجونا من كاس العرب ! گاع الدول الافريقية ، كاينين دول مافيهمش تا الكوابن و الفراقي ديالهم مفرحينهم ! دول الفراقي ديالهم كايصبنو گراصنهم راسهم و توني يساينو ينشف عاد يلبسو و هاكاك خالقين الفرحة و الفرجة !

حنا والو ! من نهار عقلت على راسي وانا كانسمع بالمنتخب المغربي و شي منتخب ماشفت! من نهار تزاديت وانا كانسمع على   اسطورة المنتخب المغربي و غانديرو و غانربحو و غانجيبو مدرب و غايمشي مدرب ووالو تاحاجة ماتبدلات كانظن انه نقدر نموت قبل مانشوف المنتخب المغربي دا شي كاس العرب و لا كاس افريقيا و لا كاس العالم هاداك بلا ماندويو عليه ! ماغانديوه تايمشيو گاع الدول يعيشو فالقمر و نبقاو غا بوحدنا فهاد “العالم”

والو من نهار عقلت و حنا كانحمدو الله و نشكروه على الفرقة لي كونا و كانتمناو انها تحصد الالقاب فالمستقبل و فاللخر كاتحصد القلاوي ! آ القلاوي على عينيك آ سيدي ! هاد المستقبل ماعمرو ماغادي يجي !

عيت من هاد الاحساس ديال اليأس و الفقصة مورا مباريات المنتخب ! حتى كانتمناو تاحنا نفرحو و نخرجو نكلاكسونيو فالزنقة و كايصدمونا ! فحالا حنا مامكتابش لينا نفرحو ! الشعب كايبغي الكورة كايموت على الكورة و لكن الكورة ماكاتحملناش! مامعطياش لينا !