كود – أصيلة //

احتافل الأديب والإعلامي المغربي محمد البوعناني بعيد ميلادو 97، بكلمات كلها حب لمدينتو أصيلة، اللي اختار يرجع ليها فهاد المناسبة الخاصة.

وقال البوعناني فواحد التدوينة ديالو فسوشيل ميديا :

“97 عاماً من العطاء والحياة اليوم وفيوم عيد ميلادي، أبت قدماي ـ أو بالأحرى عجلاتي إلا أن تعودا إلى حضن أصيلة، مدينتي الحبيبة التي شهدت أولى خطواتي على هذه الأرض شوارعها تعرفني، ونسيمها يحمل ذكرياتي، ونخيلها شاهد على رحلة طويلة من الأيام والفصول، سبع وتسعون سنة… والقلب لا يزال يخفق بحب هذه المدينة الجميلة التي لا تشيخ شكراً لكل من أضاء دربي، وشكراً لأصيلة على أنها ظلت دائماً تنتظرني“.

وكيتعتبر البوعناني من الوجوه المعروفة فالثقافة والإعلام فالمغرب، البوعناني قرا فالمدرسة العليا للمعلمين وتخرج عام 1950 بميزة ممتازة، ومن بعد خدم أستاذ فالريف ومن بعد فتطوان،

ولكن الحب ديالو بالإعلام خلاه يتجه للإذاعة، فين خدم فالراديو المغربي فالرباط، ومن بعد فالقسم العربي ديال إذاعة باريس، ومن بعد الاستقلال رجع وخدا منصب رئيس البرامج فـإذاعة المملكة المغربية، حتى فالمجلات شد رئاسة تحرير “الفنون” و“حدائق”، وكان مراسل لعدد من الجرائد العربية.

وفالمجال السمعي البصري، دار بزاف ديال البرامج الإذاعية وقدم مسابقات ثقافية فالتلفزة المغربية، وخلّى بصمة كبيرة فالميدان الثقافي، وحتى فالجمعيات كان من المؤسسين ديال جمعية المحيط فأصيلة، والرئيس المؤسس لجمعية “البرولا إنقاذ”، وشارك فتنشيط الحياة الثقافية والاجتماعية فالمدينة.

أما فالشعر، فالموهبة ديالو بانت بكري، وبدا كينشر القصايد ديالو من أواخر الأربعينات، وولا صوت شعري معروف واليوم وصل لـ97 عام، باقي محمد البوعناني كيعطي مثال فالعطاء والحب، وكيأكد باللي أصيلة بالنسبة ليه مدينة ما كتشيبش بحالو .