وكالات//

صدرات محكمة فتايلاند مذكرة توقيف فحق جاكافونغ “آن” جاكراتغاتيب، اللي هي وحدة من الشركاء فملكية منظمة ملكة جمال الكون، وهادشي ف إطار قضية ديال النصب اللي كانت توجّهت ليها فـ2023 وتطلقات وقتها بكفالة.
وقالت المحكمة الجزئية ديال بانكوك الجنوبية فبيان بأن جاكافونغ ما حضرتش قدّام المحكمة وما خبراتهمش قبل، وهادشي خلا السلطات تعتبرها ممكن تهرب. وحددات المحكمة الجلسة الجديدة فـ 26 دجنبر الجاي.
جاكافونغ والشركة ديالها “JKN Global Group Public Co. Ltd.” متابعين فدعوى كاتهمهم بالنصب على واحد السيد سميتو راويوات ماشامادول خلال بيع سندات الشركة فـ2023، وهو الاستثمار اللي كيقول بأنه سبّب ليه خسارة ديال حوالي 30 مليون بات، يعني تقريباً 930 ألف دولار.
وكتواجه شركة “JKN” مشاكل مالية مستمرة من 2023، وهاتشي خلاها تدخل فإجراءات إعادة جدولة الديون فمحكمة الإفلاس المركزية فـ2024، حيث التقديرات ديال الشركة كتوصل ديونها لحوالي 3 مليار بات (تقريباً 93 مليون دولار).
وكانات الشركة شراّت حقوق مسابقة ملكة جمال الكون فـ2022 من “IMG Worldwide LLC”، ومن بعد باعت نص الحصة ديالها فـ2023 لشركة “Legacy Holding Group USA” اللي كتخصّع لرجل الأعمال المكسيكي راؤول روشا كانتو.