كود اكادير//

أكادير كتوجد من 23 حتى لـ25 أكتوبر 2025 للدورة الثالثة ديال المهرجان الدولي ديال القيتارة “تالكيتارت”، اللي ولى من أبرز المواعيد الفنية فإفريقيا والمغرب. هاد المهرجان من تنظيم منتدى “أكادير ميموري” بشراكة مع جماعة أكادير ووزارة الثقافة، وكيهدف يرجّع لأكادير ضوها الفني وتقوا مكانتها كمدينة ديال الإبداع والذاكرة. العروض غادي تكون فبزاف د ساحات بحال ساحة ولي العهد وسينما الصحراء وشارع علال بن عبدالله، وغادي يشارك فيها فنانين من المغرب وإفريقيا، بحال قادر ترهانين من الجزائر، بومبينو بوند من النيجر، وكلوريا ماسيكا من كينيا، وأبو ديارا من مالي، إلى جانب فنانين مغاربة بحال علي فايق وزورا تانيرت وعزيز أوسوس.

هاد الدورة جات متزامنة مع كأس إفريقيا، وهاد الشي غادي يعطي طابع خاص للمدينة اللي غادي تجمع بين الفن والرياضة. المهرجان ماشي غير موسيقى، ولكن تجربة فنية وإنسانية كترجع الروح لأكادير وكتبرز هويتها الأمازيغية والإفريقية. مهرجان “تالكيتارت” كيراهن على الحوار والتنوع، وكيعزز صورة أكادير ثقافياً وسياحياً. وبفضل تعاون السلطات والمؤسسات، ولى الحدث موعد سنوي كيجمع محبي الݣيتارة من ݣاع العالم.