الرئيسية > كود-تيفي > من بعد 50 عام.. أكاديمية الأوسكار اعتاذرات لممثلة من ليزانديان دميريكان – فيديوهات
18/08/2022 00:00 كود-تيفي

من بعد 50 عام.. أكاديمية الأوسكار اعتاذرات لممثلة من ليزانديان دميريكان – فيديوهات

من بعد 50 عام.. أكاديمية الأوسكار اعتاذرات لممثلة من ليزانديان دميريكان – فيديوهات

وكالات //

من بعد 50 عام على الحادث اللي وقع من فوق لاسين ديال حفل الأوسكار، أخيرا اعتاذرات أكاديمية الفنون والعلوم السينمائية في الولايات المتحدة اللي كتمنح جوائز الأوسكار لساتشين ليتل فيذر (Sacheen Littlefeather)، الناشطة والممثلة الميريكانية اللي كتنتمي للسكان الأصليين.

وتعرضات فيذر للإهانة على خشبة الأوسكار ف1973، فاش جات بالنيابة على الممثل مارلون براندو اللي كان ربح جائزة أحسن ممثل داك العام، واللي رفض باش يستلم الأوسكار احتجاجا على الإهانة والحكَرة اللي كيتعرضو ليها السكان الأصليين من طرف صناع الأفلام فالميريكان، وكلفها تبلغهم رفضو لهاد اطروفي، وبهاد المناسبة دارت كلمة قصيرة لكن عدد كبير من الحاضرين فالقاعة غوتو عليها وعايروها قبل ماتخرج فحالها.

ساتشين ليتل فيذر اللي حتى هي من السكان الأصليين يعني الهنود ديال ميريكان كانت عندها 26 عام فاش دارت خطابها المشهور فوق الخشبة، نهار حفلة الأوسكار المذكورة، على الإهانات الكثيرة اللي كيتعرض ليها “شعبها” فهوليود وفمجال صناعة الأفلام عموما.

ومن بعدما دازت دبا 50 عام قررات أكاديمية الأوسكار باش تعتاذر للفنانة اللي غادرت المسرح (فحفلة 1973) فوق خاطرها، وقالت أن الإهانة والتمييز اللي تعرضات ليه، حتى من بعد حفل الأوسكار، مامقبولينش وماعندهم حتى تبرير.

وقالت الأكاديمية نهار الإثنين بللي غتستقبل  لتل فذر، اللي عندها دبا 75 عام، فسهرة “Evening of conservation, healing and celebration” نهار  17 سبتمبر الجاي.

موضوعات أخرى