كود -كازا //

فـ26 أبريل 1986، وقع انفجار فالمفاعل النووي الرابع ديال محطة تشيرنوبيل فـأوكرانيا، وطلق كميات كبيرة ديال الإشعاع النووي اللي بدّل وجه المنطقة بشكل نهائي.

من داك الوقت وحتى دابا، المنطقة اللي حدا المحطة اللي كيتسمّاوها “منطقة العزل” ولات بحال مختبر طبيعي  كيدرسو فيه العلماء  تأثير الإشعاع على الكائنات الحية.

كلاب تشيرنوبيل اللي عايشين من أكثر الحيوانات اللي درسات مزيان، أبحاث من جامعة كولومبيا فـ 2023 بيّنت باللي هاد الكلاب عندها تغييرات كبيرة فالمورّثات ديالها مقارنة مع كلاب عادية، حيث الحمض النووي ديالها تبدّل عبر أجيال بسبب الإشعاع.

أما الذئاب، فقدّرو العلماء يلقاو عند بعض منها تغييرات فالجهاز المناعي ديالها، ولات عندها قدرة أكبر باش تقاوم بعض الأمراض بحال السرطان، وهذا الشي خلّى الباحثين مستغربين وفتح باب ديال أفكار جديدة فالعلاج الطبي.

أما الفيران ولات عندها قدرة كبيرة على إصلاح الحمض النووي اللي كيتضرر من الإشعاع، وحتى بعض الطيور بحال الحسون، طلع عندها مستوى ديال مضادات الأكسدة فالجسم، اللي كتنقص من ضرر الإشعاع على الخلايا.

من أغرب الاكتشافات فـ تشيرنوبيل هو ظهور فݣيع كحل كيكبر من بينها نوع اسمو Cladosporium sphaerospermum، وفيه مادة سميتها الميلانين لي كتقدر تمتص الإشعاع وتحولو لطاقة كيميائية.

الطريقة اللي كتخدم بها هاد الفطريات بحال بالنباتات، ولكن عوض ما تعتمد على الضو كتستعمل الإشعاع،

العلماء مهتمين بهاد الكائنات بزاف، حيث ممكن تعاون فالمستقبل فحماية رواد الفضاء من الإشعاع الكوني ولا حتى فتنقية المناطق اللي تلوّثات نووياً.