كود سبور//

خلف تكليف الاتحاد الدولي لكرة القدم “الفيفا” للشركة الوطنية للإذاعة والتلفزة المغربية بالسهر على نقل فعاليات كأس العالم للأندية، اللي غادي يتقام بالمغرب شهر فبراير من العام الجاي نفور من الجماهير المغربية اللي ما عجبهاش الحال.

وتفاعلو بزاف ديال المغاربة مع الإعلان عن اعتماد ‏الفيفا الشركة الوطنية للإذاعة والتلفزة المغربية كمنتج رسمي لمنافسات كأس العالم للأندية بالمغرب، وبزاف منهم استغرب وتساءل حول قدرتها على أن تكون قادرة على تأمين نقل فالمستوى للبطولة يشرف المغرب.

مواقع التواصل الاجتماعي كانت مكان خصب لتساؤلات الجماهير المغربية واللي الكثير منها شكك بقدرة الشركة الوطنية للإذاعة والتلفزة على إنتاج كأس العالم للأندية، خصوصا من بعد “الشوهة” اللي قامت بها قنواتها فنقل استقبال المغاربة للمنتخب الوطني المغربي الثلاثاء الماضي، حيث شافو بزاف المغاربة أن الشركة لم تكن فمستوى حدث عظيم من هاد الحجم خصوصا وأنه كان كيحمل دلالات كبيرة ولكن الاستوديو التحليلي الناشف والإخراج وجودة البث والنقل المباشر كان ضعيف بزاف.

وكاين تخوف كبير عند المغاربة من خطوة الاتحاد الدولي لكرة القدم الفيفا باعتماد الشركة الوطنية للإذاعة والتلفزة المغاربية لإنتاج منافسات كأس العالم للأندية، صحيح أنهم باغيين شركة مغربية هي اللي تشرف على هاد القضية ولكن الثقة ديالهم هربات منها بسبب فشلها فعدد من المحطات، وكيشوفو أن الطريقة اللي كتشتغل بها قنواتها صبحت قديمة بزاف ومتجاوزة بسنوات.. سوا فالبرامج الرياضية اللي صبحت مناسباتية وفيها غير الشفاوي، أو نقل مباريات المنتخب الوطني المغربي والبطولة الوطنية ماتشات الفرق المغربية فالمنافسات الإفريقية.