مصطفى المزابي-كود سطات//
ناضت گيرة في جماعة الخزازة إقليم سطات لبارح الثلاثاء في الملف المشهور ديال “امعيدات” لي سنوات وهو كيدور في المحاكم ومشى حتى لمحكمة النقض ورجعات وفي تعليقها قالت فيما مضمونه “هاد الاحكام والقرارات راه تخربيق سيرو عاودو هاد الشي من لول”.
ومنين تعاود الملف وتحكم بالعدل قال بان الارض كترجع لمصطفى معيدة وخوتو الورثة وبلي ولاد عمهم كانو طلبوها يستغلوها للسكن غير مؤقتا من بعد مابقاوش بغاو يخرجو.
الملف كانو داخلين فيه حقوقيين على حساب الگاميلة وهما لي كانو كيوقفو ذاك الشي في تحدي للقانون والوقوف ضد تنفيذ حكم قضائي صدر باسم سيدنا.
أخيراً دارت سرية الدرك الملكي بثلاثاء الأولاد انزال وجاو وقفو على تنفيذ الحكم بقوة، ونزلات اكثر من 100 عنصر من القوات المساعدة وتنفذ الحكك بقوة القانون.
المصيبة الاعظم في هاد الشي ان ثلاثة من لي محتلين الارض بغاو ينتحارو وواحد منهم قصد جادارمي وضربو وبغا ياخذ ليه الفردي وهرسو من صبعو.
هاكدا سالا واحد من الملفات الشهيرة في الجماعات الترابية ديال اقليم سطات وهكذا تنفذ ملف امعيدات وسالا الفيلم.
