الرئيسية > ميديا وثقافة > من بعد الكاريكاتير ديال أردوكَان فصفحتها الرئيسية.. المدعي العام فأنقرة علن على فتح تحقيق ضد مجلة “شارلي إيبدو” الساخرة.. والرئيس التركي: أنا ضرني خاطري غير على الرسول 
28/10/2020 15:00 ميديا وثقافة

من بعد الكاريكاتير ديال أردوكَان فصفحتها الرئيسية.. المدعي العام فأنقرة علن على فتح تحقيق ضد مجلة “شارلي إيبدو” الساخرة.. والرئيس التركي: أنا ضرني خاطري غير على الرسول 

من بعد الكاريكاتير ديال أردوكَان فصفحتها الرئيسية.. المدعي العام فأنقرة علن على فتح تحقيق ضد مجلة “شارلي إيبدو” الساخرة.. والرئيس التركي: أنا ضرني خاطري غير على الرسول 

عن لوموند- بتصرف//

ماكاملاش سيمانة على الروينة اللي ناضت فالعالم الإسلامي بعد دفاع الرئيس الفرنسي إمانويل ماكرون على الكاريكاتير المسيئ لرسول الإسلام، مجلة “شارلي إيبدو”، مولات الرسومات المسيئة، نشرات صورة كتسيء للرئيس التركي، رجب طيب أردوكان، فالصفحة الأولى ديال عدد بارح الثلاثاء، وهذشي جبد عليها الصداع مع تركيا.

والرئاسة التركية علنات على إدانتها وغضبها من هذ الرسم، وقالت انه “كيعكس العداء للأتراك والإسلام”، واردوكَان قال، فخطاب ليه اليوم: “ماشفتش هذ الكارتون، وماكاين لاش نقول شي حاجة لهذ الأوغاد، وانا اللي مقلقني ماشي الهجوم عليا لكن على النبي”.

المدعي العام فانقرة، علن اليوم الاربعاء، على فتحت تحقيق ضد رؤساء المجلة الساخرة، بسبب الرسم اللي كيبان فيه الرئيس التركي بوجه قبيح، كَالس ففوتوي غير بالملابس الداخلية، ومعاه “جارية” كيعري ليها على المؤخرة، ديالها، بينما هي كتسربيه الشراب، وكيقول : “آه آ الرسول”.

وكانت قالت إدارة الاتصالات بالرئاسة التركية، بمجرد خروج الرسم، أنه “سيتم اتخاذ الإجراءات القانونية والدبلوماسية اللازمة ضد الرسم المذكور”، وخرجات البيان بالفرنسية.

و”شارلي إيبدو” دارت هذ الرسم بعد الخرجة ديال أردوكَان، الاثنين اللي فات، واللي شكك فيه فالصحة العقلية ديال الرئيس الفرنسي، إيمانويل ماكرون، ودعوتو لمقاطعة المنتوجات الفرنسية.

ودابا مازال نايضة قربالة ففرانسا بعد ذبح أستاذ عرض كاريكاتير مسيئ لرسول الإسلام على التلاميذ الديالو، الشيء اللي خلا الرئيس الفرنسي يدعم هذ الروسومات، ويعتبرها نوع من حرية التعبير، وهذشي جبد عليه الصداع مع المسلمين.

ومجلة “شارلي إيبدو” تعرفات بعد الهجوم الإرهابي عليها سنة 2015، اللي تسبب فموت 10 صحافيين و2 بوليس، وهذشي بسبب رسوم مسيئة للرسول والدين الإسلامي عامة.

المقال الأصلي هنا:

https://www.lemonde.fr/international/article/2020/10/28/le-parquet-d-ankara-ouvre-une-enquete-contre-charlie-hebdo-apres-la-publication-d-une-caricature-d-erdogan_6057661_3210.html

موضوعات أخرى

02/12/2020 19:30

شوهة وصافي. مظاهرة البوليساريو فبروكسيل فشلات. شاركو فيها 20 واحد من عائلة وحدة وممثلهم بشرايا واليسار الراديكالي اللي كيعاونهم غبر ولمغاربة دارو عقلهم وخلاوهم بوحدهم