كود -عثمان الشرقي//

فأول خروج ليها من بعد التوقف الرمضاني ديال الفرقة، بانت الفنانة الأمازيغية هدى فـلايف على تيك توك، من بعد موجة ديال الإشاعات  والتخمينات اللي راجت فمواقع التواصل الاجتماعي.

فهاد الغياب، خرجات بزاف ديال الإشاعات على سبب عدم استئنافها العمل مع لحسن الخنيفري والمجموعة، كاين اللي قال بلي تزوجات، وكاين اللي قال اعتازلات، وزيد عليها الهضرة على خلاف بينها وبين الفنان لحسن لخنيفري، الشي للي كان نفاه الفنان سابقا فتصريحو لموقع ݣود.

فالبث المباشر هدى وضحات الأمور وقالت بأنها غير خذات واحد الفترة ديال الراحة وبغات تبعد شوية على الأضواء، ونفات گاع الإشاعات اللي تروجات بلا حتى شي مصدر رسمي. وطمنت الجمهور ديالها بأنها بخير، وأكدات أنها غادي ترجع قريب للساحة الفنية باش تكمل النشاط ديالها.

الظهور ديالها خلق تفاعل كبير عند المتابعين، بزاف منهم عبّرو على الفرحة ديالهم برجوعها، خاصة من بعد هاد الغياب اللي خلا الناس كيتساؤلو.

وبهاد اللايف، هدى وصلات رسالة طمأنة لجمهورها، اللي كيتسنى يشوفها راجعة من جديد، خصوصاً فالرقص مع لحسن لخنيفري فالسهرات والمهرجانات الجاية.