كود -وكالات//

التلفزيون الحكومي الإيراني والقنوات اللي تابعة للحرس الثوري دوززو واحد الفيديو فيه 3 د الدقايق، تحت عنوان  “فين وكيفاش  غا نقتلو بارون ترامب؟”. هاد الفيديو رصد مكافأة مالية كتوصل لـ 10 ملايين دولار كاش لأي واحد جاب راسو ولا تخلص.

https://x.com/StealthIntelOps/status/2091591591530320149

بارون ترامب، اللي دابا عندو 20 عام وكيقرا في الجامعة، لقى راسو هو الهدف الجديد د التهديدات د كبار المسؤولين ف إيران، الفيديو اللي تشر ف قنوات رسمية بحال القناة الثالثة الإيرانية، قال باللي الاستخبارات ديالهم متبعة التحركات ديالو خطوة بخطوة. ووراوْا فيه لقطات ديال الجامعة فين كيقرا، السيارات د المرافقة، وحتا البلايص فين كيوقفو ديبلوماسيين ورجال الأمن ديال جهاز الخدمة السرية الأمريكي اللي حاميينو.

كيف ما قالو أنهم قدرو يخترقوا الحماية ديالو مع شي”بنت” تلاقات معاه ف اجتماع سري، حتى  الحسابات ديالو د الألعاب على منصات بحال “إكس بوكس” و”ديسكورد” محضية باش يجمعوا عليه معلومات.

النظام فهران حالف ياخد الثأر أو ما يسمونه بـ “القصاص الشريعي”، واعتبروا باللي عائلة ترامب كلها ولات مستهدفة. وقبل بارون، كانت وكالة “تسنيم” الإيرانية نشرات فيديو آخر كيهدد السيدة الأولى ميلانيا ترامب وكيهضر على طرق تسميمها ولا اغتيالها.

من جيهتها، الخدمة السرية الأمريكية، خرجت ببيان رسمي أكدات فيه باللي عندها خبار بهاد الفيديو وكتعامل مع التهديد بجدية تامة.

المتحدث باسم الجهاز، نيت هيرينغ، قال لشبكة CNN Arabic باللي كيديروا تحقيق دقيق فأي حاجة كتهدد الناس اللي تحت الحماية ديالهم، واخا مابغاش يدخل ف التفاصيل الاستخباراتية لأسباب أمنية.

أما دونالد ترامب، فكان حذر سابقاً باللي أي محاولة للبلاد ديالو ولا لعائلتو غادي تخلي “إيران كاملة تنفجر” وغادي تمسحها أمريكا من فوق الأرض. الأوضاع بقات متوترة بزاف، خصوصاً مع الهجومات الاقتصادية والعقوبات القاصحة اللي فرضاتها واشنطن مؤخراً على طهران.