أميمة عطية – كود كازا ///

لجأ الإعلامي رضوان الرمضاني، مدير إذاعة ميد راديو، للقضاء ضد مروجي إشاعة لي كتكول بلًي خدا بارطما فاخرة فحي راقي فالرباط، كتسوى ما بين 300 و350 مليون سنتيم، وأنها كانت كادو من رئيس الحكومة عزيز أخنوش.

وخرج الرمضاني، فحلقة من برنامجو “غرفة الفار”، وأكد على أنه قرر هاد المرة مايدويش فهاد الموضوع، و أنه لجأ للقضاء مباشرة من بعدما تم تداول هاد المعطيات على صفحات وحسابات مختلفة فمواقع التواصل الاجتماعي.

وأكد مدير إذاعة ميد راديو، على أنو شاف المنشورات والحسابات اللي روجات لهاد الكلام، وأنه استعان بمحاميه وبعون قضائي باش اوثقو هاد المحتويات، مشيرا إلى أن المحامية، بصفتها نائبة عليه وعلى إذاعة ميد راديو، تقدمت بشكاية وطالبت بفتح تحقيق عاجل.

وكال الرمضاني فخرجتو الإعلامية فميدراديو، على أنه سبق ليه سكت على بزاف ديال المواضيع والحملات اللي استهدفتو، وكان كيتعامل معاها بالضحك وماكيدير والو، ولكن هاد المرة قرر يمشي للمحكمة، مضيفا أن الملف غادي ياخد المسار القانوني ديالو.

وأكد الإعلامي أن امتلاك بارطما بهاد القيمة فالرباط هو حلم بنسبة ليه، نافيا بشكل واضح أنه يكون قبل بأي كادو من عند المسؤول الحكومي.

ومن جهة أخرى ، أكد الرمضاني  على أنه مستعد يخلي القضاء يفصل فهاد القضية، ورفع بهادا التحدي وكال: “إلا ثبتات المحكمة بالفعل هادشي بهاد القيمة المالية فغادي ندرق كمارتي ونغبر ومامبقاش نبان ونحشم على عراضي”.

وفالمقابل، أكد أنه إلا تبين للقضاء أن هاد الادعاءات غير صحيحة، فهو ما غاديش يكتفي غير برد الاعتبار، ولكن غادي يطالب بتعويض مالي يوازي القيمة اللي تم تداولها للشقة، أي ما بين 300 و350 مليون سنتيم.

وشدد الرمضاني على أن الحسم فهاد القضية غادي يكون عند القضاء، و أن الشكاية الهدف منها هو فتح تحقيق والكشف على الحقيقة وا تحديد المسؤولين على نشرها وترويجها.