الرئيسية > كود سبور > من بعدما تعصب وهددهم بالرحيل.. البدراوي وصلو الصهد وخرج يبرد جمهور الرجاء
25/09/2022 17:00 كود سبور

من بعدما تعصب وهددهم بالرحيل.. البدراوي وصلو الصهد وخرج يبرد جمهور الرجاء

من بعدما تعصب وهددهم بالرحيل.. البدراوي وصلو الصهد وخرج يبرد جمهور الرجاء

كود سبور//

خرج عزيزي البدراوي رئيس الرجاء الرياضي مرة أخرى ليخاطب جماهير الفريق وهو كيحاول يمتص الغضب ديالهم من بعدما عددهم يوم أمس السبت، بالرحيل عن النادي حيث عيا جسديا وذهنيا بسبب الضغط منذ انتخابه رئيسا للفريق.

البدراوي وكيف العادة طل على جماهير الرجاء من نافذة الأنستغرام ديالو ونشر رسالة كلها مودة وتزواق الكلام، محاولا تلطيف الجو المكهرب مع الجمهور بسبب تعيين التونسي منذر الكبير اللي ما باغيه حد يدرب الفريق، وأيضا بسبب تصريحات ديالو هو اللي هدد فيها بالرحيل حيث عيا وانهك بسبب التسيير فالرجاء وغيغادر قبل نهاية الموسم  إذا توقف الدعم ديال الجمهور.

ونشر البدراوي رسالة شابعا رومنسية لجمهور الرجاء وحاول يتودد لهم مزيان، وقالهم: “كنشكرم على رسائل المحبة والتشجيع اللي قصفتوني بها خلال الساعات القليلة الفايتة”، وتكلم لهم على حب الرجاء اللي كيجمعهم وشعار الخضرا فمحاولة لامتصاص غضب الرجاويين اللي الصبر ديالهم بسبب التسيير الانفرادي ديالو بدأ كيتقادا، خصوصا وأن النتائج ماكيناش وتم تغيير المدرب من بعد مرور 3 ماتشات فقط جاب مدرب شوماج والتجارب الماضية ديالو كانت فاشلة.

رئيس الرجاء البدراوي باش يزيد من فاعلية الكلام لمعسول ما تكلمش هذه المرة على الرحيل من الفريق  وبقى كيتحدث على الوقت اللي عطيه للفريق، وبدأ كيحاول يبرر الأخطاء ديالو وقال: “تجربة جديدة فالتسيير الرياضي، وبفريق بحجم وقيمة الرجاء، أكيد من يشتغل كثيرا معرض للخطأ ما كنقولش لكم اني كامل ومكمول”.

طريقة الحديث ديال البدراوي كانت حنينة هذه المرة، وكأن شي واحد من المقربين ديالو  نبهو للزلات اللي كيدير وهو كيتكلم قدام الكاميرات، حيث كينفاعل وكيولي غير يدخل ويخرج فالكلام، والدليل هو التقديم ديال المدرب الجديد للفريق، حيث فالوقت اللي كان الجمهور ديال الرجاء كينتظر التعرف على التونسي منذر الكبير بشكل أكبر ولماذا تم الاختيار ديالو هو بالضبط لتدريب الفريق، ناض “با عزوز” كيفما كيلقبوه الرجاويين وهو  معصب، وبدا كيهدد بالرحيل ووصف المعارضين له بالميكروبات والمسؤولين اللي سبقوه فتسيير الرجاء بالاقزام، لكن اليوم تراجع على التهديد ديالو وبدأ كيرطب وقال للرجاويين: “ما بخلتوش علي بالدعم والمساندة، واللي خاصكم تعرفو انا كندير كل ما فجهدي باش فرقتنا تكون مستقبلا واقفا وماتحتاج لحتى واحد”.

موضوعات أخرى

08/12/2022 21:36

قصبة مولاي الحسن بفاس.. دور صفيحية وبنايات مهددة بالانهيار ومسؤول من وزارة الثقافة لـ”كود”: تدخلنا تقني والموقع تابع لإدارة الدفاع