كود -عثمان الشرقي//
فـ 28 أكتوبر 1886، كاع الأنظار كانت متجهة لواحد الجزيرة صغيرة فنيويورك. وسط الضباب مني دشن تمثال الحرية الشهير.
هاد التمثال ما جاش غير هكاك، ولكن كان هدية من الشعب الفرنسي للشعب الأمريكي، بمناسبة مئوية الاستقلال ديالهم، ومن تمّا وهو واقف تما كيشوف فالمحيط.
التمثال ف الأصل ماشي غير حديد ونحاس، هو تجسيد حي للأفكار ديال الفلاسفة الكبار بحال جون لوك، لي ديما هضر على حق الإنسان ف الحرية والحياة ولي تزاد فنفس هاد النهار.
الفكرة بدات ف فرنسا عام 1865 عند واحد المفكر سميتو لابلوي، ولي عجباتو بزاف الديمقراطية لي وصلات ليها ميريكان, هاد خينة كلف النحات فردريك بارتولدي باش يصاوب التحفة.
بارتولدي دار تمثال ديال امرأة هازة فنار شاعل باش يضوي الطريق، وف اليد الأخرى هازة لوحة مكتوب فيها تاريخ استقلال أمريكا (4 يوليو 1776).
باش يوقف هاد التمتال ف وجه الريح د البحر والمشاكل د الجو، بارتولدي طلب المساعدة من واحد المعلم كبير ف الهندسة، لي هو غوستاف إيفل (المهندس لي صاوب برج إيفل من بعد).
إيفل صاوب ليه هيكل لداخل ديال الحديد صحيح ومطاطي فنفس الوقت، باش النحاس لي برا يقدر يتحرك شوية مع الريح بلا ما يتهرس.
التمثال تفرتك على 350 طَرف، ومشا فالبابور عبر المحيط حتى وصل لنيويورك، وتما عاودوا ركبوه بحال شي “بوزل” (Puzzle) عملاق!
مع الوقت، التمثال مبقاش غير هدية بين جوج بلدان، ولى هو الرمز الأول ديال الأمل. أي واحد هربان من الجوع أو الحرب ف أوروبا وديك الساع وجاي لميريكان ف البابور، أول حاجة كانت كبان ليه من بعيد هي هاد السيدة شادة الفنار.
اليوم، واخا داز عليه كتر من 140 عام، باقي تمثال الحرية واقف ف بلاصتو، كيفكر العالم كامل بلي الحرية بحال داك المشعل… خاص ديما نحافظوا عليه شاعل.