وكالات//

هزّات جريمة خايبة بزاف مدينة الطيبة شرق درعا ف سوريا، من بعد ما شاب قتل المعلّمة لي كان سيمتها سماح الزعبي (27 عام)، غير حيت كانت كترفض مرات عديدة تتزوّج بيه. هاد الحادثة شعّلات الغضب والاستنكار ف مواقع التواصل الاجتماعي.

وحسب المعلومات الأولية اللي تداولات فوسائل إعلام محلية، الجاني كان حاول بزاف المرات يطلب يد سماح، ولكن هي وعائلتها رفضوه حيت كانت عندو سمعة خايبة وكيتعاطى المخدرات. وهاد الشي كيرجّح أنه هو اللي خلاه يدير هاد الجريمة من بعد ما تشبّثات بالرفض. التفاصيل كيبانو أن الجريمة كانت انتقام مباشر، من بعد ما ما قدرش يفرض راسو عليها.

من جهتها، أعلنت وزارة الداخلية السورية أنها حدّدات هوية القاتل ومكان وجوده بالضبط، ودارت عملية أمنية سريعة قادت لاعتقالو وحجز السلاح اللي استعمل، وكل هاد الشي ف أقل من 24 ساعة على وقوع الجريمة. وتم تحويلو مباشرة للقضاء المختص باش يكملو التحقيقات ويتّخذو الإجراءات القانونية.

عائلة سماح حتى هي خرجات ببيان عبّرات فيه على الصدمة الكبيرة اللي عاشوها، وطالبو بتحقيق واضح وإنزال أشد العقوبات فحق القاتل، وأكدّو ف نفس الوقت أنهم ملتازمين بالقانون ورافضين أي شكل ديال الثأر أو الاعتداء على عائلة الجاني.

وزادت الجريمة شعلات موجة كبيرة ديال الغضب عند الناس ف المنصات، حيث بزاف ديال الناشطين قالو إن استهداف امرأة غير حيت رفضات الزواج كيهدّد قيم المجتمع وأمان النساء، وطالبو بعقوبات قاسية ضد أي واحد كيرتكب جرائم مرتبطة بالضغط الاجتماعي أو العنف القائم على النوع.