وكالات//

أعلن الرئيس الأمريكي السابق باراك أوباما ومراتو ميشيل أوباما أنهم غادي يدخلو لأول مرة لعالم مسارح برودواي كمنتجين، من خلال تقديم نسخة جديدة من المسرحية المعروفة ’’البرهان”، اللي سبق وربحات جوج جوائز كبار: توني وبوليتزر.

هاد المشروع غادي يكون عبر شركة الإنتاج ديالهم “هاير غراوند”، بتعاون مع المخرج الحاصل على جائزة توني توماس كيل، والمنتج مايك بوسنر. وهاد الخطوة كتعتبر توسع جديد للشركة اللي سبق ليها نجحات فمجالات بحال السينما والبودكاست والأفلام الوثائقية.

العرض غادي يعرف حتى أول ظهور للممثلة آيو إديبيري، بطلة مسلسل “ذا بير”، فوق خشبة مسرح برودواي فدور “كاثرين”، بنت عالم رياضيات عبقري ولكن كان عندو مشاكل نفسية، واللي غادي يجسد شخصيتو الممثل دون تشيدل.

القصة كتدور حول الصراع النفسي اللي كتعيشو كاثرين من بعد وفاة باها، خصوصا ملي كتلقى مذكرات فيها برهان رياضي ثوري، وهاد الشي كيخليها تواجه أسئلة كبيرة حول العبقرية والإرث العائلي وحتى الشك فذكائها.