كود -كازا //

مورا ما سالا الحج ديال عام 1979 ، مجموعة مسلحة سيطرات على أقدس بلاصة عند المسلمين، مني دخلات الحرم المكي بسلاح والقرطاس وفرضات حصار دام كثر من جوج سيمانات ولي خلا عشرات القتلى .

لي كان واقف مورا هاد الهجوم هو جهيمان العتيبي ،واحد السعودي كان خدام مع الحرس الوطني، قبل ما يولي مع التيارات السلفية اللي كانت كتشوف أن المجتمع والدولة بداو كيبعدو على الإسلام الصحيح بسبب التغيرات الاجتماعية اللي عرفاتها السعودية فالسبعينيات.

من بعد أسس جهيمان مع مجموعة من أتباعو تنظيم تسما “الجماعة السلفية المحتسبة” ،هاد الجماعة كانت كتنتاقد الدولة والمجتمع، ومن بعد طورات أفكارها حتى وصلات للاعتقاد بأن محمد بن عبد الله القحطاني، اللي كان نسيب جهيمان هو المهدي المنتظر اللي غادي يبان فآخر الزمان.

فلفجر ديال 20 نونبر 1979، دخل العتيبي وصحابو للحرم المكي بسلاح والقرطاس لي خباوها فتوابيت على أسس انها جتت غا يتصلا عليها ، قبل ما يعلن جهيمان وأتباعو أن القحطاني هو المهدي المنتظر وطالبو الناس يبايعوه، ومن بعد سدّو أبواب الحرم وسيطرو على المسجد الحرام.

فالأيام اللولة حاولات السلطات السعودية تحل الأزمة بالمفاوضات، ولكن جهيمان وأتباعو رفضو يستسلمو، قبل ما تخرج فتوى دينية كتسمح باستعمال القوة لتحرير الحرم، بدات القوات السعودية عمليات عسكرية فاشلة ضد المسلحين اللي كانو متحصنين وسط القباب والأنفاق لي كاينة تحت المسجد الحرام.

السعودية مقدرتش بوحدها توقف صحاب العتيبي داكشي علاش جابت وحدة التدخل الخاصة الفرنسية GIGN لي عاونو للقوات السعودية،  فطريقة التعامل مع المسلحين المتحصنين تحت الأرض .

الحرب بقات فالحرم المكي 2 سيمانات حتى تقتل محمد بن عبد الله القحطاني، اللي كانو أتباع جهيمان كيعتابروه المهدي المنتظر، وهاد الشي ضعف تقة الجماعة ، قبل ما يقدر اخيرا الجيش السعودي يدخل ويرجع السيطرة على الحرم المكي نهار 4 دجنبر 1979.

السلطات السعودية علنات ديك الوقت بلي تقتل 127 واحد و 450 تصابو، ولكن بعض الباحثين والصحفيين اللي درسو الحادثة من بعد كيعتابرو أن العدد الحقيقي للضحايا كان كثر، ويقدر يوصل لمئات القتلى ،من جهة أخرى تقتل عدد كبير من أفراد الجماعة المسلحة، وتشدو عشرات آخرين ،ومن بعد محاكمات استمرت أسابيع، خرج حكم الإعدام على 63 واحد من المشاركين فالهجوم، من بينهم جهيمان العتيبي، وتنفذ الحكم فبداية سنة 1980 فعدد من لمدن السعودية.
.