كود – مولاي يعقوب//

السلطة المحلية التابعة لقيادة عين بوعلي بإقليم مولاي يعقوب إما ممسوقاش لهاد الكارثة اللي واقعة وإما المقدمين ديالها ناعسين. فقد كشفت مصادر لـ”كود” أن مجهولين لاحوا من ليلة الثلاثاء الفايت خناشي كبار فيهم الدجاج ميت.

هاد الكارثة الخطيرة، حسب ما كشفت عنه مصادر “كود”، كاينة بين واحد الطريق رابطة بين حمرية وعين بوعلي، وتحديدا بين دوار سرارجة ودوار المقدم (بلاد خمسة وقات).

المصدر المجهول لهاد الدجاج خاص يتعرف، تقول مصادرنا، والتي أكدت أنه إلى حدود كتابة هاد الأسطر مزال داك الدجاج الميت مليوح تما خصوصا أن الدود بدا ياكلو، وتخوفت الساكنة من تداعيات هاد الحادث وبغات فتح بحث قضائي لمعرفة شكون لاح داك الدجاج تما وفين كان، وشنو واقع بالضبط، وعلاش هادي 3 يام ما جابتليه السلطة الخبار.