كود سبور- زنجبار//

عبر الگول الدولي مغربي منير المحمدي حارس مرمى نهضة بركان، انه باغي يبرح كاس الكونفدرالية الأفريقية ويزيدو على لقب البطولة الاحترافية اللي ربحها مع الفريق البرتقالي هذا الموسم.

وهضر منير المحمدي وقال فتصريح لجورنال “گود”، اليوم الجمعة على هامش تواجد استعدادات الفريق بجزيرة زنجبار للفينال ديال كاس الكونفدرالية ضد سيمبا التنزاني الاحد الجاي وقال: “حنا واجدين لهذا الفينال ومستعدين باش نرجعو بالكاس للمغرب ونفرحو الجمهور ديالنا، حنا راه درنا مجهود العام كامل باش نكونو أبطال وهذا الشي خاصنا نبينوه نهار الاحد فالتيران، الماتش ما غايكونش ساهل، لكن حنا واجدين له فيريكمون وتكتيكمون”.

وكمل منير المحمدي وقال: “بغينا نكونو الطوب ديال الكورة فلافريك، وعارفين ان الطريق ما غاتكونش سهلة، ودابا بغينا نزيدو لقب كاس الكونفدرالية على لقب البطولة الاحترافية اللي ربحنا هذا العام”.

گود سول منير المحمدي على دور التجربة ديالو لتحقيق لقب كأس الكونفيدرالية، كحارس عندو خبرة مع المنتخب المغربي بالقارة الأفريقية، وقال: “وي الفريق معول على التجربة ديالي ولكن فالاخير كل ماتش كايكون تجربة جديدة، وحتى أنا تلعمت بزاف ديال الحوايج هنا فنهضة بركان، مع صحابي اللاعبين والمدرب وباغيين نديو اللقبين”.