گود – وكالات//

برلين عاشت الأحد اللي فات واحد الديكور اللي خلّى السياح بتصدمو ،مئات ديال الرجال والعيالات خرجو عريانين فوق البيكالات، ودارو فوق شوارع العاصمة الألمانية فواحد المسيرة .

التظاهرة، اللي جات فإطار World Naked Bike Ride (WNBR)، جمعات 700 مشارك وقطعات مسافة ديال 33 كيلومتر وسط برلين، المشاركون دازو من مناطق ومعالم معروفة، من بينها “ماور بارك”، وبقايا جدار برلين، وحتى قدّام مبنى البرلمان الألماني وبوابة براندنبورغ،

المنظمون كيقولوا بلي العرا فهاد التظاهرة ماشي عندو طابع جنسي، ولكن كيرمز للحرية والاحتجاج ديال على طموبيلات لي كيهددو راكبي بيكالات، زيد عليها تقبل الأجساد كيف ما كانت، والدفاع على البيئة وثقافة التعايش واحترام التوجهات .

التظاهرة مرتبطة حتى بثقافة Freikörperkultur (FKK)، المعروفة ف ألمانيا بثقافة “الجسد الحر”، وخلّات شوارع برلين نهار الأحد كلشي عريان ،الشعار ديال الحركة هو “Bare as you dare” (تعرى شحال ما قدرتي). هادشي كيعني أن العرا الكامل ماشي إجباري ،وخا السياح والناس ف الشارع كياخدوا صور عامة للحدث ولكن ممنوع تصور شي حد فوجهو بلا خبارو، المنظمين كيركزوا على أن الهدف هو الاحتجاج ماشي التحول لـ “فرجة” أو مادة للتنمر ف وسائل التواصل الاجتماعي.