كود سبور//

عطى الاتحاد الدولي لكرة القدم، الضوء الأخضر للأندية المشاركة فكأس العالم للأندية 2026 المقامة فالميريكان ما بين 14 يونيو و13 يوليوز الجاي، باش تحتفظ باللاعبين ديالها خلال التوقف الدولي المقبل ديال شهر يونيو، وهذا الشي غايخلق مشكل المنتخب المغربي اللي كايوجد لكأس أفريقيا 2025، واللي غاتكون ف ديسمبر الجاي.

وقرر الاتحاد الدولي لكرة القدم، منح حق القبول أو الرفض للفرق المشاركة فكأس العالم للأندية 2025، في أنها تخلي اللاعبين الدوليين ديالها يمشيو يشاركو مع المنتخبات ديالهم فالتوقف الدولي ديال شهر يونيو الجاي، ومن بين الأندية المشاركة فالمونديال كاين الوداد الرياضي اللي عندو كل من جمال حركاس ومهدي بنعبيد فالمنتخب المغربي، وريال مدريد اللي عندو ابراهيم دياز فالمنتخب المغربي، وباريس سان جرمان اللي عندو أشرف حكيمي فالمنتخب المغربي، ونفس الشي بالنسبة لبايرن ميونخ الألماني اللي مصيفط آدم ازنو بريطي لبلد الوليد وباغيين يعولو عليه فالمونديال والعين اللي عندهم سفيان رحيمي، والهلال اللي عندهم ياسين بونو، مع العلم أن أندية بحال ريال مدريد رفضو يخليو براهيم دياز يشارك مع المنتخب الأولمبي العام اللي فات فأولمبياد باريس وبالمقابل وافقت أندية أخرى بحال باريس سان جرمان والعين على مشاركة نجميها أشرف حكيمي وسفيان رحيمي.

هذا الشي غايخلق للناخب الوطني وليد الركراكي، عائق حيث كايوجد مع المنتخب المغربي لكأس إفريقيا، وكل توقف دولي فهو فرصة باش الكروب يتجمع وينسجم اكثر، وغياب هاد اللاعبين المحتمل ممكن يؤثر على ليكيب ناسيونال.