كود ـ كازا//

واحد البروموتور معروف في كازا، تيخضع للأبحاث والتحقيقات اللي كتشرف عليها الفرقة الوطنية، تحت إشراف الوكيل العام للملك، همو أنه بقا هاد العام بلا عمرة رمضان، ومقدرش ينافس أقرانو من البرومتورات اللي مشاو، قال لك يغسلو عضامهم بعمرة رمضانية “في أي بي”.

هاد المنعش اللي ممشاش العمرة، اتضح أن السلطات القضائية هي اللي منعاتو، باش يبقا رهن البحث والتحقيق، خصوصا أنه يقدر يكون متورط في عملية خطيرة تاع تزوير بلانات المشاريع تاعو كلها تقريبا، وهي القضية اللي متورط فيها شي مهندس وموظف ووحدين آخرين مازالت سرية البحث ممكناتش باش يتعرفو كاملين.

المهم خونا فالله ما التحقش بالمجموعة ديال المنعشين اللي مشاو العمرة، حيث خاصو يبقا رهن البحث حتى يتخاذ القرار في حقو.

وهاد الفضيحة كانت كشفاتها واحد الشكاية مرفوقة بتقرير مفصل حول مجمل التلاعبات اللي نهجها المنعش وكيفاش احتال على المحافظة وغيرها من الإدارات، وكيفاش وفر الآلاف تاع الميتروات بعد ما بدل التصميم المصادق عليه من قبل الجهات المعنية، ودار تصميم آخر كيتماشى معا الأطماع الربحية تاعو، طبعا باش يجمع الفلوس.

عملية التزوير اللي تتحقق فيها الفرقة الوطنية خطيرة وماكرة في نفس الوقت، حيث كينسخو البلانات المعدلة وتيستعملو بطاقة المعلومات تاع البلان المصادق عليه “الكارتوش” ويحطوها في الكاداستر، لاستخراج رسوم مجزأة من الرسم العقاري الأم، وفي هاد اللعبة تيزيدو جوج طوابق في البروجي أو يبني في مساحات أخرى، وغيرها من المخالفات، بلا ميعيقو بيهم.

حست الشكاية المبنية على التقرير، كشفات بالواضح ماشي بالمرموز، اللهطة تاع هاد المنهش العقاري، اللي قدم تصاميم للمحافظة العقارية مخالفة لديك اللي مرخصة من قبل جماعة الدار البيضاء، يعني أنه بالاستعانة بمهندس تاعو، شرعن المخالفات الكبيرة اللي ما يمكنش يحصل بيها على “بيرمي دابيتي” ولا على التحفيظ تاع الشقق والقسمة وغيرها. المهم السيد فركعها بالمزيان ونجحات ليه القضية وزاد اعتامدها في جميع المشاريع تاعو.

دابا نائب الوكيل العام للملك بالبيضاء، اللي كان متبع الضوصي، ومعروف بالصرامة في تطبيق القانون، غادي يتحول لمحكمة تاع سلا، والناس اللي متبعا الملف تتسنى أشنو غادي يوقع، وخايفين من تبريد الطرح، واخا الجرائم التعميرية المرتكبة خطيرة، وتتضرب ماشي غير قانون التعمير وتصاميم الوكالة الحضرية، بل حتى المنافسة المشروعة.

المهم القضية غادي طيح بزاف الريوس، ومازال هاد الطاشرون نفسو، عندو مشكل في سيدي رحال، داير مابغا في إدارات برشيد وعندو بلانات مصادق عليهم في سيدي بليوط. الحاصول معرفتش كيفاش بحال هذا تيمشي للعمرة، واش باش يمحي ذنوب وغش العام للي فات ويبدا من جديد في وحدين خرين..؟ فهم تسطا!.