كود -سبتة///

حسب إذاعة Cadena SER الإسبانية، وصل عدد ضحايا فاجعة تراخال فسبتة تال عشية الثلاث 4 غشت 2026 ل 141 حراگ لي غرقو فمحاولة الدخول الجماعي لمدينة.

المعطيات الرسمية اللي نقلاتها الإذاعة كتقول بلي عدد الجثث اللي خرجات من جهة سبتة طلعات من 75 ل 78 جثة، بعدما تم تلقاو 3 ضحايا جداد ،وفالمقابل، أكدات منظمة Caminando Fronteras أنها وثقات 63 جثة من المياه المغربية بعد تتبع عمل فالمشارح وسبيطارات بشمال المغرب، وهكا وصل العدد الإجمالي للوفيات 141 واحد كتقول المنظمة.

المنظمة كتزيد بلي الجثث دابا موزعة على مشارح 4 سبيطارات فـتطوان وطنجة والفنيدق ورينكون، ومازال كاين تخوف من إمكانية العثور على ضحايا آخرين.

ؤ وفق مصادر مطلعة على التحقيق، فأغلب الضحايا شباب بين 20 و30 سنة، رجال مغاربة، و عدد قليل من الحراگة لي جايين من إفريقيا جنوب الصحرا، وعدد محدود من العيالات، وقاصرين بأعداد قليلة جداً.

من جهتها، قالت المتحدثة باسم منظمة Caminando Fronteras على أن الكارثة خاصها تتعامل بحال حوادث الطائرات والقطارات من حيث اعتبارها حادث متعدد الضحايا، وطالبت بالإسراع فالتعرف على هويات القتلى، لحقاش بزاف ديال العائلات مازال كيقلبو على أولادهم وأقاربهم.