وكالات //

بداو المسؤولين في منظمة الصحة العالمية كيدقو ناقوس لخطر بخصوص الانتشار المحتمل ديال واحد السخانة سميتها “حمى الضنك” كتهدد صحة الناس وتقدر تقتل، ومعروف أنها كتنتاشر في المناطق الاستوائية.

العلماء كيقولو أن التغيرات المناخية لي كيعرفها العالم والاحتباس الحراري، غادي يخلي هاد السخانة تنتاشر في العالم كامل. ومعروف أن لي كينقلها بين الناس بشكل كبير هي شنيولة.

كيقولو العلماء د منظمة الصحة العالمية أنه خاص دابا الدول توجد راسها مزيان لهادشي خاصة في أوروبا وأمريكا الشمالية وحتى في جنوب قارة إفريقيا، لي مكنتش كتعرف هاد النوع د السخانة.

هاد السخانة معروفة بزاف في آسيا وأمريكا الجنوبية وكتقتل كل عام 20 ألف واحد.

المصيبة ف هاد السخانة أنها معندهاش دوا نهائيا وكتعتامد فقط على شي أساليب ديال الوقاية، وايلا شداتك السخانة القاسحة ديالها صعيب تخرج منها حي.