وكالات//

علنات منصة ’’إكس” ديال إيلون ماسك أنها دارت إجراءات تقنية باش تمنع أداة الذكاء الاصطناعي “كَروك” من أنها تصايب صور فيها ناس حقيقيين عراة، وهاد الخطوة جات فوسط ضغوط رقابية كتكبر فأوروبا وبريطانيا.

وقالت المنصة فبيان تنشر مع ليل الأربعاء فالولايات المتحدة: “درنا إجراءات تقنية باش نمنعو غروك يبدّل صور ديال أشخاص حقيقيين ويخلّيهم لابسين لباس فاضح‘‘.

وأكدات، حسب ’’فرانس برس”، بلّي هاد القيود كتطبّق على جميع المستخدمين، حتى اللي مشتركين فالخدمة المدفوعة.

ولكن، أشار البيان حتى لوجود حظر جغرافي كيتطبّق غير فالمناطق اللي فيها إنشاء بحال هاد الصور ممنوع بالقانون، وهاد الشي خلّى تساؤلات كتطرح على مدى فعالية هاد الإجراءات.

ورحّب الاتحاد الأوروبي والمملكة المتحدة بهاد الخطوة ولكن بحذر، وكيأكدو على ضرورة الالتزام الكامل بالقوانين المحلية.

وقال توما رينييه، المتحدّث باسم قسم الشؤون الرقمية فالمفوضية الأوروبية: “إلى ما كانتش هاد التغييرات فعّالة، ما غاديش نترددو نستعملو كامل الصلاحيات التشريعية ديالنا، بما فيها فرض غرامات مالية ولا حتى توقيف خدمة الشبكة الاجتماعية داخل الاتحاد الأوروبي‘‘.