احمد الطيب كود الرباط//
منصب رئاسة لجنة العدل والتشريع بمجلس النواب ولى شبهة تابعا لي ترشح ليه، العجيب هو اعلان ترشح جديد لبرلماني غير معروف هادي اسبوع علن التحاقو بالمعارضة هو رؤوف عبدلاوي منعم، مرشح حزب جبهة القوى الديمقراطية، حطو حميد شباط، عفريت حزب الاستقلال، اللي جرا عليه تيار حمدي ولد الرشيد بعدما تسبب ليهم فمشاكل كبيرة وخربق حزب علال الفاسي.
العجيب فهاد الترشح لي كينافس مرشح حزب الحركة الشعبية الطبيب سعيد سرار، جا فوقت لي كيتحاكم فيه الرئيس السابق للجنة العدل والتشريع محمد مبدع. المنصب توسخ بسباب صحاب الملفات الثقيلة بجرائم الأموال، إضافة إلى أنه حتى للي دازو قبل من مبدع، واللي هوما فالحركة الشعبية طاحو بقرارات المحكمة الدستورية حيث ساهمو بتزوير الانتخابات ودارو تخلويض باش يطلعو للبرلمان.
الحركة الشعبية عطات صورة خايبا عن المعارضة، بحيث كتعارض الحكومة بالمتابعين فملفات خانزة.
قيادي فالأغلبية أكد لـ”كود” بلي هوما غادي يصوتو لصالح مرشح الحركة الشعبية احتراما للعرف وللدستور، واخا مراضينش عليه، مضيفا :”كان على المعارضة التنسيق أكثر باش تعطي مرشح يكون قادر على هاد المنصب”.
وشدد القيادي فالأغلبية لـ”كود” :”دبا حنا واحلين بين اوزين وشباط وكلاهما كيدير نفس المعارضة ديال الغوات والتنقاز السياسي”.
اليوم غاتكون جلسة التصويت على رئيس لجنة العدل والتشريع، خلفا للمعتقل محمد مبدع. سياسيا ضربة كبيرة لأوزين وصحابو، لي فشلو يحطو بروفايلات نقية قادرة على تحمل المسؤولية.
