كود بني ملال//

المندوبية السامية للتخطيط كشفات فواحد التقرير الجديد على عدد السكان والعائلات فالدواوير ديال المغرب، وقالت باللي كاين أكثر من 13.5 مليون مغربي كيسكنو فـ33 ألف و189 دوار موزعين على كامل أقاليم المملكة. التقرير أكد عاوتاني باللي الشّيخوخة بدات كتدخل تدريجياً حتى للعالم القروي، وهادشي كيبان من خلال التوزيع السكاني وحجم الأسر داخل الدواوير.

زاد التقرير بين باللي جهة بني ملال – خنيفرة عندها من بين أقل المعدلات ديال التجمعات القروية، حيث كل جماعة قروية فيها تقريباً 21 دوار ، اما المتوسط الوطني كيوصل 25.9 دوار لكل جماعة قروية. بالمقابل، جهة سوس – ماسة كتسجل أعلى معدل ديال التجمعات القروية بـ35.5 دوار لكل جماعة، وهادشي كيعكس كثافة سكانية أكبر ووجود العديد من الدواوير المتقاربة.

من ناحية أخرى، جهة العيون الساقية الحمراء والداخلة وادي الذهب هما الأقل من حيث عدد الدواوير، حيث كل جماعة قروية فيهم كتضم تقريباً 3 دواوير فقط، وهادشي كيبين ندرة التجمعات القروية فهاد المناطق وكثرة المساحات الفارغة.

هاد النتائج كتعطي صورة واضحة على التنوع الجغرافي والسكاني فالمغرب، وكاتبيت كيفاش كل جهة كتختلف على الأخرى من حيث توزيع الفيلاجات وحجم الأسر، وكتورّي بلي العالم القروي كيبدا يتأثر بالتغيرات الديموغرافية، خصوصاً الشّيخوخة والانتقال نحو المدن الكبيرة.