كود – كازا //

قالت المندوبية السامية للتخطيط، فمعطيات جديدة متعلقة بعام 2025، باللي 103 آلاف دري فعمرهم ما بين 7 و17 عام كيمارسو نشاط اقتصادي فالمغرب، الشي لي كيمثل 1.3% من مجموع الأطفال فهاد الفئة العمرية.

وكيبان من الأرقام أن الظاهرة منتشرة بزاف فالعالم القروي، فين كتوصل النسبة لـ2.4%، مقابل غير 0.5% فالمدن. كما أن الأولاد كيشكلو الأغلبية من الأطفال العاملين بنسبة 86.2%، و89.8% عندهم ما بين 15 و17 عام، و76.2% كيسكنو فالفيلاجات.

التقرير كيبين بلي العلاقة قوية بين الخدمة والانقطاع على القراية، ومن بين دراري اللي خدامين، غير 11% مازال كيقراو، و88% قطعو القرايا، و1% ما عمروهم دخلو للمدرسة.

وبخصوص القطاعات اللي كيخدمو فيها دراري، كاينة الفلاحة والغابة والصيد البحري بنسبة69.1% فالعالم القروي، أما فالمدن، فالخدمات كتخدم 51.2% من لوليدات، متبوعة بالصناعة بنسبة 28.4%.

وفالدواور 57.9%، كيعونو عائلاتهم بلا خلاص، و32.6% كيخدمو بالفلوس، أما فالمدن، فالغالبية كيخدمو بأجر بنسبة 58.6%.

ومن أخطر المعطيات اللي جا بها التقرير أن 58.4% من الأطفال العاملين يعني 59 ألف طفل، كيديرو خدمة خطيرة يمكن تشكل تهديد لصحتهم وسلامتهم.

فالبني تسجل نسبة مرتفعة ديال الأعمال الخطيرة لي كيديروها لوليدات واللي وصلات لـ71.3%، أما الصناعة فوصلات لـ78.4%، والخدمات لـ76.3%. أما الفلاحة والغابة والصيد البحري فسجلات 43.6%.

الدراسة كتقول بلي تشغيل الأطفال كاين وسط الأسر اللي مستوى التعليم عندها ضعيف، الشي لي كيبين أن الفقر والهشاشة الاجتماعية مازالو من بين الأسباب اللي كيدفعو الدراري لسوق الشغل فسن مبكرة.