عمر المزين – كود///

كشف تقرير ديال المندوبية السامية للتخطيط باللي الطلب الداخلي سجل ارتفاع ملحوظ فالفصل الثالث من عام 2025 بنسبة 7,6 فالمية مقابل 5,9 فاالمية نفس الفترة ديال 2024، وساهم فالنمو الاقتصادي بـ8,3 نقط عوض 6,5 نقط.

وجاء هاد التحسن بالأساس، حسب التقرير ديال المندوبية، اللي توصلات بيه “كود”، من ارتفاع الاستثمار بنسبة 15% عوض 11,8 فالمية، اللي ساهم بـ4,6 نقط فالنمو، وكذا ارتفاع استهلاك الأسر بـ3,9 فالمية بدل 3 فالمية، بمساهمة وصلات لـ2,3 نقط.

كما عرفات النفقات ديال الإدارات العمومية حتى هي ارتفاعا، حيث وصل المعدل ديال النمو ديالها لـ7,4 قالمية بعد ما كان 5,5 فالمية، وساهمات بـ1,3 نقطة فالنمو الاقتصادي.

وكشفات المندوبية باللي الناتج الداخلي الإجمالي عرف فالفصل الثالث من عام 2025 ارتفاع وصل لـ5,7 فالمية عوض 8,7 فالمية سنة من قبل، وهادشي نتج عنو تباطؤ فالمستوى العام ديال الأسعار لـ1٫7 فالمية عوض 3,7 فالمية خلال نفس الفصل من العام الفايت.