أميمة عطية كود كازا ///

سجل المغرب إنجاز جديد فالسوق الأوروبية، بعدما ولات صادرات الماندرين المغربي نحو إيرلندا كتسجل مستويات قياسية، وسط ارتفاع كبير فالطلب على المنتوج الوطني.

وحسب معطيات منصة “إيست فروت” المتخصصة فأسواق المنتجات الفلاحية، فإن إيرلندا استوردات فالموسم الفلاحي من أكتوبر 2025 حتى ماي 2026 حوالي 8700 طن من اليوسفي المغربي، بقيمة مالية تجاوزات 9.5 مليون يورو.

هاد الأرقام كتعني ارتفاع بنسبة 30% مقارنة مع الموسم اللي فات، كما أنها كتقارب ضعف الكميات اللي كان المغرب كيصدرها قبل 4 سنين، وهو ما كيأكد التطور الكبير اللي عرفهو حضور الماندرين المغربي فالسوق الإيرلندية.

وخا كتبقى السوق الإيرلندية صغيرة نسبياً، إلا أنها كتعتبر سوق واعدة، وكتستورد تقريباً 100% من الحاجيات ديالها من الماندرين بسبب الظروف المناخية، وكيعرف الطلب على هاد الديسير ارتفاع كبير خصوصاً ففترة أعياد الميلاد، اللي ولات فيها الحمضيات جزء من العادات الاستهلاكية ديال الأسر الإيرلندية.

وفهاد الموسم الحالي، تمكن المغرب من تقوية موقعو بقوة، بحيث تراوحت حصتو من واردات السوق الإيرلندية بين 50% و75% خلال الفترة الممتدة من دجنبر حتى أبريل.

وسجلت صادرات المغرب فشهر أبريل، بعدما تجاوزت الشحنات 2000 طن، وهو تغيير مهم مقارنة مع السنوات السابقة، اللي كانت فيها أعلى مستويات التصدير كتسجل غالباً خلال يناير وفبراير.

وفي المقابل، تراجعت حصة إسبانيا، المنافس التقليدي للمغرب، حيث انخفضت وارداتها نحو السوق الإيرلندية بنسبة 30% مقارنة مع الموسم الماضي، بينما سجل المغرب ارتفاعاً بنفس النسبة.

وكيرجع هاد النجاح لتطور الإنتاج الفلاحي المغربي، وتوسع الطاقة التصديرية، وجودة المنتوج، والأسعار التنافسية.