گود سبور//

ما راضينش المنخرطين ديال الوداد الرياضي على الطريقة باش عرض عليهم هشام ايت منة للقاء التواصلي اللي ناوي يديرو معهم يوم 4 ماي 2026 فتيران بنجلون، ومن المنتظر ما يحضروش له.

عدد كبير من منخرطين الوداد الرياضي ما بقاوش راضيين على طريقة تسيير هشام ايت منة للنادي، بحالهم بحال جماهير الحمرا، اللي ولاو كايطالبو بالمحاسبة ديالو ويمشي بحالو، وقرر يدير هذا اللقاء باش يمتص به غضب المنخرطين عليه، ولكن غير زاد عمها.

مجموعة من منخرطين الوداد الرياضي ما غادي يحضرو لهاد اللقاء التواصلي ديال ايت منة، وكاعيين حتى من الطريقة اللي بغاهم يحضرو بها هذا الاجتماع، وخصوصا انه قالهم يصيفطو له الأسئلة اللي ناويين يسولوها له قبل هذا اللقاء، واللي ما دارش هاد الخطوة ما غاديش تعطاه فرصة يسول الرئيس فاللقاء التواصلي، وهذا الشي اللي كايشوفوه المنخرطين ماشي معقول، وانه باغي يختار الاسئلة اللي توجه له، باش يجاوب على اللي بغا ويهرب من الاسئلة القاصحة المحرجة اللي كاتهم الأغلاط اللي دار فالفرقة والمراقبة المالية.

للإشارة فمجموعة من منخرطين الوداد الرياضي، بداو فالخطوات القانونية باش يطالبو بالافتحاص المالي للوداد الرياضي فمرحلة هشام ايت منة، وباغيين يتحاسبو معه قبل ما يمشي من الوداد ويعرفو كل درهم فين مشى فالوقت ديالو.