كود كازا ///

شي نحس ضرب معرض الفرس بالجديدة هاد العام. اليوم الاحد 22 اكتوبر 2023 كان من المفروض يكون حفل اختتام هاد الدورة٬ غير هو العاصفة الرملية اللي ضربات عدد من المناطق المغربية منها الجديدة اللي فيها هاد الحدث٬ خلات المنظمين يلغيو الاحتفال ويلغيو الانشطة اللي كانت مبرمجة اليوم.

الجهة المنظمة شوية مصرفقة. راه كانت نشرة اذارية دارتها الارصاد الجوية هادي ايام٬ كان عليها تقدم الحفل البارح السبت.

لكن ماشي غير العاصفة الرملية للي خرجات على هاد النشاط هاد العام٬ تزامنو مع بداية الحرب فغزة خلات الاقبال عليه قليل مقارنة بالسابق. دورة فشي شكل دازت هاد العام وصافي.

ديك الهدرة اللي قالها هاداك محمد الكوهين، الكاتب العام المساعد لجمعية معرض الفرس بالجديدة، اليوم الأحد، على الحضور ماشي مقنعة بزاف. قال باللي المغرض زارو كثر من 200 ألف زائر.

قال باللي “نسخة هذه السنة أوفت بكل وعودها، وذلك على الرغم من الظروف المناخية غير المواتية التي شهدها اليوم الأخير للدورة الحالية للمعرض”.

شكون يشكرك يا لعروسة.