كود تنغير//
إقليم تنغير غادي يحتضن من 2 حتى لـ 4 ماي 2025 منتدى المضايق والواحات، تحت شعار: “المضايق والواحات: روافع للتنمية الترابية المستدامة بالإقليم”، فمبادرة كتنظمها عدة مؤسسات بشراكة مع عمالة الإقليم والمجلس الإقليمي وعدد من الجماعات.
المنتدى غادي يكون فرصة كبيرة باش يتم التعريف بالمؤهلات الطبيعية والثقافية ديال المنطقة، وغادي يتخللو أنشطة متنوعة: رياضية، ثقافية، فنية وعلمية. ومن بين أبرز اللحظات، كاين سباقات رياضية وسط المضايق والواحات، اللي غادي يشارك فيها أبطال كبار بحال هشام الكروج وعبد القادر موعزيز، واللي غادي يعطيو دفع للشباب باش يقبل على الرياضة.
من جهة أخرى، المنتدى غادي يدعم الاقتصاد المحلي، بحيث غادي تنظم معارض ديال المنتجات المجالية والصناعة التقليدية، وغادي يكون فضاء للتعاونيات باش تعرض منتوجاتها وتتواصل مع الزوار.
كذلك، المنتدى غادي يعطي اهتمام كبير للابتكار، من خلال تنظيم هاكاثون جهوي خاص بأفكار جديدة لحماية الواحات والمضايق، بمشاركة شباب من مختلف المناطق.
وغادي يكونو ندوات علمية بمشاركة أساتذة وخبراء، باش يتبادلو التجارب ويقترحو حلول عملية للتنمية المستدامة فالمنطقة.
